Home Historie Artieste Bestuurders Febrikke Gouverneurs Kemedie Meziek Vollekstiepe De Werreke
 Ulrich van Löwendal
Ulrich Frederik Woldemar van Löwendal. Gouverneur 1748
Ziene Pa Woldemar Freiher van Löwendal
Ulrich Frederik Woldemar, graaf van Löwendal is gebore op 6 Aprèl 1700 in Hamburg, en gestorreve op 27 Mei 1755 in Parijs. Heer waor 'n veuraonstaond Deens Milletaer en Staotsmaan, in 't Europa vaan de 18e iew. Heer waor oonder aandere Ginneraol in 't keizerleke Franse leger, Maarschalk vaan Fraankriek, korte tied Gouverneur vaan Estland, woernummend Gouverneur-Generaol vaan de Zuidelijke Nederlanden, en Milletaer Gouverneur vaan Brussel en Mestreech. Ulrich Frederik Woldemar, graaf van Löwendal waor ouch bekind um zien euverwinninge in de Oostenrijkse Successieoorlog, en in Nederland veur zien gruutse verovering in 1747 vaan Bergen op Zoom. Zien awwers waore Woldemar van Löwendal (1660-1740) en Dorothea van Brockdorff (1672-1706). Woldemar van Löwendal trouwde twie kier. Oet de ierste ech mèt Dorotha van Brochdorff (1672-1706) woort Ulrich Frederik Woldemar van Löwendal  gebore. Op 29 Jannewarie 1709 trouwde heer, mèt Benedicta Margaretha van Rantzau.  Oet dee ech woorte veer kinder gebore; 1. Augustus Baron von Löwendal 2. Anna Sophie Baroness von Löwendal 3. Friedericus August Baron von Löwendal 4.Margarethe Adelheid Benedicte Baroness von Löwendal. Evels al de kinder zien op jonge leeftied gestorreve. Ziene pa Woldemar van Löwendal waor oonder aandere Kaptein vaan de Blauwe Garde vaan 't Staatse leger, Deens Stadshouder in Noorwegen, en Hofmaarschalk en Minister in 't keurvorstedom Saksen. Ziene opa waor ne bastaard- zoon vaan Keuning Frederik II van Denemarken.
Ulrich Frederik Woldemar, graaf van Löwendal trouwde ouch twie kier. Op 23 januari 1722 trouwde heer mèt zien ierste vrouw, Theodora Eugenia von Schmettau (1705-1768), dochter vaan 'n Saksische Generaol. De ech eindigde in 1736 in 'n sjeiing. Oet zien ierste ech woorte veer kinder gebore; 1.Woldemar Hendrik van Löwendal (1723-1724) 2.Frederik Woldemar van Löwendal(1724-1740) 3.Benedikta van Löwendal (1725-1753), in 1747 getrouwd mèt Johann Rudolf von Kiesewetter. 4.Dorothea Frederike van Löwendal(1727-1750) Op 13 November 1736 trouwde heer mèt zien twiede vrouw, Gravin Barbe Madeleine Szembek (1709-1762), mèt häör kraog heer ouch veer kinder; 1.Franz Xaver Joseph, graaf van Danneskiold-Lovendal (1742-1808) in 1772 getrouwd mèt Charlotte de Bourbon-Charolais (1754-1839) 2.Elisabeth Marie Constance van Löwendal (1740-1785), in 1759 getrouwd mèt Lancelot Turpin, graaf van Crissé en Sanzay (†1793) 3.Benedikta Sophia Antoinette van Löwendal, (1741-voor 1778), in 1757 getrouwd mèt graaf Alexander Ossolinski (†nao 1789) 4.Marie Louise van Löwendal, (1746-1835), in 1766 getrouwd mèt graaf Louis Antoine Léon de Brancas (1735-1821). Ulrich Frederik Woldemar, graaf van Löwendal begós al joonk aon zien Milletaere laopbaon. In 1713, wie heer dertien jaor waor, voch heer al in 't leger vaan Keizer Karel VI in Polen, en e jaor later woort heer al tot Kaptein bevorderd. Nao e korte tied es vrijwilleger in Deense deens te zien gewees, kierde heer in 1716 weer trök nao 't Keizerleke leger, en oondersjeide ziech bij de Slag van Petrvaradin, en de belegeringe vaan Timisoara en Belgrado, tijdens de Venetiaans-Oostenrijkse Turkenoorlog vaan 1714 tot 1718.
Later góng Löwendal in deens vaan Keuning August II van Polen, dee häöm benumde tot Veldmaarschalk vaan de Saksische Infanterie. In 1733 oondersjeide heer ziech bij de verdiediging vaan Krakau, tijdens de Poolse Opstand. In 1734 en 1735 had heer 't opperbevel euver de Saksische tróppe aon de Rijn. Naotot van Löwendal in deens vaan de Russe waor getrejd, versloog heer in 1739 de Turken bij Chotyn in de veerde Russische-Turkse oorlog. Vaan 1741 tot 1743 voch heer in Finland tege de Zweden. In deen tied waor heer ouch Gouverneur vaan Estland. In 1740 waor de Oostenrijkse Successieoorlog oetgebroke tösse Fraankriek, Spanje, Beieren en Pruisen, tege de Habsburgse Monarchie, Saksen, Rusland, Sardinië, Groot-Brittannië en de Republiek der Zeven Verenigde Nederlanden. Keuning Lodewijk XV vroog aon Löwendal um in zien leger es Lutenant-Generaol te denen, wat heer daan ouch deeg. Ulrich Frederik Woldemar van Löwendal veurde 't Franse reserve-leger aon, bij de Slag bij Fontenoy in 1745, en oondersjeide ziech bij de belegering vaan Doornik. Daonao veroverde heer in korte tied, Oudenaarde, Gent, Brugge, Damme, Oostende, Nieuwpoort, Leuven, Sluis, Sas van Gent, en es lètste Bergen op Zoom. ‘t Belèk vaan Bergen op Zoom deurde ruim twie maond, meh op 6 September trok Ulrich van Löwendal mèt zien soldaote de Vestingsstad Bergen op Zoom binne. Bij ‘t belèk vele aon Franse kant 5.250 doeje en aon de Nederlandse kant 5.000 doeje. Mestreech waor aon 't einde vaan de  Oostenrijkse Successieoorlog 't trefpunt vaan de tróppe Oostenrijk, Beieren, Saksen, Hessen Hongarije en Engeland oonder leiding vaan Hertog van Cumberland, en de Franse oonder leiding vaan Maurits van Saksen. In 1747 waor de Slag van Lafelt boe de geallieerde tróppe 'ne zwoere nederlaog lijde. De Franse tróppe mèt Maurits van Saksen hadde hunne intrek genome in de abdij De Hocht, en naome op 7 Mei 1748 de stad Mestreech in. Ulrich van Löwendal woort daonao benump tot Gouverneur vaan Mestreech.
Maurits van Saksen 1696-1750.
Elsterschloss in Elsterwerde.
Femiliewaope van Löwendal.
Ulrich Frederik Woldemar, graaf van Löwendal
Ulrich Frederik Woldemar, graaf van Löwendal
Belèk vaan Bergen op Zoom. 1747.