Home Historie Artieste Bestuurders Febrikke Gouverneurs Kemedie Meziek Vollekstiepe De Werreke
Fons Olterdissen
Alfons Olterdissen 1865 -1923
Heinrich,Hermann, Olterdissen woort op 15 Juni 1827 gebore in  Emden (Hannover) en waor es 16 jaorege soldaot gelegerd in Mestreech. Mestreech behuurde toen nog tot 'n Hertogdom en veel binne de Duitse Boond vaan Staoten en had e soort beroeps leger. Later in 1850 kaom heer weer trök nao Mestreech en góng woene in de Hoenderstraot, woersjijnelek umtot heer verleef waor op e Mestreechs meidske. Heer trouwde mèt Alida Hendrica Femina Verhoef, gebore op 21 Oktober 1832 te Veere in Zieland, op 21 Oktober 1857 in de Lutherse kèrk in de Hoondstraot. Same hadde zie 'ne sigare winkel aon de Boschstraot nommer 963 (105). De zaak leep good jummers de mieste klante kaome oet de naobij gelege febrikke vaan Regout. Zie kraoge same ach kinder boe vaan d'r mer twie euverbleve, naomelek Guus en Fons. De aander kinder storreve tösse de drei maond en zeve jaor nao de geboorte. In deen tied waor de kindersterfte nog altied hoeg. Fons woort es zesde kind gebore op 12 December 1865 en kraog de naome vaan Alphonse,Vitor, mèt de roopnaom vaan Fons. Heer woort geduip op 22 December 1865 in de Lutherse kèrk. Zien broor Guus waor vief jaor ieder gebore en wel op 7 Miert 1860. Heer kraog de naome vaan Guustaaf, Adolf. Op 21 Augustus 1900 trouwt Guus mèt May 'n zuster vaan Henri Goovaerts. Henri Goovaerts waor 'ne gooje vreund vaan Fons. May en Guus kraoge same eine zoon in 1901, Herman Siegfried . De gebreurs Fons en Guus kóste good mèt ein opsjete en beteikende daan ouch väöl veur ziech. Guus woort musikant en later oonder directeur bij de stedelijke mezieksjaol. Guus storf in 1942 en woort begraove op de begraofplaots vaan 't Witte Vrouweveld. In 1962 woort zien liechaam evels euvergebrach nao de algemeine begraofplaots aon de Tongerseweeg, bij zien broor Fons. Herman Siegfried Olterdissen waor de einigste erfgenaom vaan ziene Pa Guus, en vaan Fons ziene noonk. Mèt de erfenis dao woort door Herman Siegfried evels neet verstendeg mèt umgegaange umtot beveurbeeld de zegelrink, dee speciaal veur Fons waor gemaak, tot veer kier touw woort verkoch aon de baank vaan lienig in Utrecht. Väöl toneelstökke woorte veur 'nen appel en ei verkoch en de orginele mèt hand gesjreve stökke vaan De Kaptein vaan Köpenick,  woorte veur 60 gölde verkoch. Wie Fons ach jaor waor störref ziene pap. Zien mam veranderde de naom vaan  de sigarezaak in Madame de Weduwe Olterdissen. Zie verhuisde in 1870 nao de Mèrret op nommer 24 boe zie de zaak in 1924 , 54 jaor laoter verkoch. Nog gein tien maond daonao störref de mam vaan Fons. Zie woort 91 jaor.
Zoe wie in 't geboorte hoes vaan Olterdissen es de woening gelege aon de Mèrret, is 'ne gedinkstein geplaots vaan Fons die me nog altied kin zien. Fons heet deks zien mam geholpe en achter d'n toenbaank gestaande in de winkel. Heer heel hiel väöl vaan zien mam en numde häör dèks " Mie leef aajdsje " of 't Zielke vaan miech " . Um vaan Mestreech 'nen echte kuns-stad te make, riechde heer in 1895 de vereiniging op vaan "Decoratieve Kunst ", um zoe de kunszin en de verdeiling vaan de ambachte beter te kinne make. Zie organiseerde tentoenstellinge,  en kraoge d'n opdrach um groete stads poorte te make, wie Keuniging Emma en häör kroendochter Wilhelmina veur veer daog in Mestreech op bezeuk kaome. In 1896 geit Fons Olterdissen woene aon de Lage Kanaaldiek op Sint Pieter, perceis neve de ouwers vaan ziene vreund Henri Goovaerts. Henri Goovaerts reisde toen al väöl, meh had dao wel zien " Pied à Terre ". Fons riechde in zien nuie woening 'nen atteljee op um zoe zien sjèlderije beter te kinne verkaope. Heer sjèlderde de Lambertus kapel vaan binne, dee neve zien woening stoond. In 1899 woort de nuie VVV Mestreech opgeriech, oonder de naom vaan " Maastricht Vooruit ". Bij den’ ierste vergadering woort heer gekoze tot president. Oonder zien leiing organiseerde me veer groete cortèges in Mestreech, naomelek in 1905 'ne Historische stoet, in 1909 de Heiligdomsvaart, in 1912  Het Maria Congres en in 1921 de Missiestoet. De neet katholieke Fons zörgde d'r veur tot zoe hoonderd doezende lui nao Mestreech kaome. Same mèt iemes aanders sjeerf heer, de in 't Mestreechs gesjreve De Kaptein vaan Köpenick. In deen tied is 't verhaol vaan De Köpenick wereldnuits en 't stök waor e groet suksès. Den'ierste oetveuring vaan De Kaptein vaan Köpnick waor 1907 in de Bonbonnière. En later in de Dominikanerkerk (1968/1969), op 't  Vriethof (1986) en in de Sphinxzaol (1992/1993). In 1912 sjreef heer Trijn de Begijn, 'ne kemikke opera dee geit euver 'ne woerzègkster oet de St Antonius straot. Ouch heet Fons väöl kemedie stökke gesjreve en waor heer dèks d’n regiseur devaan, meh heer späölde ouch dèks mèt. Zien groetste prèstatie lieverde heer bij de kemedie mèt 't stök " Het Spel van Sint Servaas " 'n spektakel stök vaan de Heiligdomsvaart in 1916, boe aon 600 lui mèt spaolde en zie 'ne décor maakde vaan 50 meter breid en 10 meter hoeg. Fons kós good vertelle en ziene vreund Jacq van Term , hoof redakteur vaan de 'Limburger Koerier " vroog um die verhaole op te sjrieve, verhaole euver de Mestreechter Historie. Zien stökke zien 'ne woere gesjiedenis book euver in deen tied, 't leve in Mestreech. Fons kaom later ouch in de Gemeinteraod en woort inspecteur vaan de sjaole. De kinder sterfte waor in die jaore nog altied hoeg en heer heet ziech ingezat um de kinder gooi voeding te geve en veur de baby's 'n gooi opvang te regele. De crèche kraog de naom vaan Juliana en besteit nog altied en is gelege aon de Lurestraot, boe ouch ter iere vaan häöm 'n standbeeld steit.
De Kaptein vaan Köppenick oppe Vriethof
Heinrich , Hermann,(Fons) Olterdissen
Beeld vaan Alphonse Olterdissen gemaak door Willem Hofhuizen.  Groete Loeiersstraot.
Heinrich Hermann Olterdissen
De Kaptein vaan Köpenick. Gram.Plaat
Graaf vaan Fons en Guus Olterdissen