Home Historie Artieste Bestuurders Febrikke Gouverneurs Kemedie Meziek Vollekstiepe De Werreke
Börgm.Lefebvre
Emanuel Joseph Lefebvre woort gebore op 13 Miert 1772 in Mestreech, en is gestorreve op 19 Aprèl 1828 in Antwerpe. Heer waor ‘ne zoon vaan Guillaume Lefebvre (renteneer) en Jacobine Angeline Reintjes. Emanuel Joseph Lefebvre waor vaan beroop notaris, en wel  in Mestreech vaan 1795 tot 1811. Gemeinte-Ambteneer waor heer vaan 1798 tot 1799, en waor lid vaan ’t Bureau de Bienfaisance (bureau van Weldadigheid),’ne veurläöper vaan ’t Burgelijk Armbestuur. ’t Bureau de Bienfaisance had väöl geld en bezittinge, veurnaomelek aofkomstig oet de jaore 1796 en 1797, wie de Franse alle bezittinge en geujere vaan Kloesterstiechtinge hadde genaast of ingepik. Meh ouch verkrege door sjinkinge en legaten. Emanuel Joseph Lefebvre woort op 28 Aprèl 1800 gekoze en benump es ierste Börgemeister, Maire vaan Mestreech. Nao e jaor kraog heer zien congé es Maire (Börgemeister) op 8 Juni 1801. Heer naom toen weer zien beroop vaan Advocaot-Notares op. Lefebvre verhuisde mèt zien femilie in ’t jaor 1811 nao Antwerpe. Emanuel Joseph Lefebvre trouwde op 4 Jannewarie 1798 mèt Anna Helena Timmers in Mestreech. Anna Helena Timmers waor gebore in Mestreech op 12 Augustes 1762 en is gestorreve op 30 Mei 1818 in Antwerpe . Anna Helena Timmers waor ‘ne dochter vaan Kaopmaan Martin Timmers en Wilhelmine Leurs. . Anna Helena Timmers en Emanuel Joseph Lefebvre kraoge same ein dochter naomelek Maria Josephine Wilhelmine Lefebvre. Zie woort gebore op 20 November 1798 in Mestreech en is gestorreve op 14 Juli 1840 in Brussel. Maria Josephine Wilhelmine Lefebvre trouwde op 7 September 1831 mèt Abraham Etienne Gadiot. Heer woort gebore in Mestreech op10 Augustus 1798 en is gestorreve op 26 Juni 1856 in Luik. Abraham Etienne Gadiot waor Advocaot vaan beroop en renteneer vaanaof ’t jaor 1840. Abraham waor ‘ne zoon vaan Abraham Gadiot en Anna Margaretha van Caubergh. Abraham Gadiot waor ieder getrouwd mèt Maria Hubertina Graff. Emanuel Joseph Lefebvre verhuisde in ’t jaor 1811 nao Antwerpe boe heer weer ‘nen Advocaote kentoer opende. Heer is op 19 Aprèl 1828 gestorreve in Antwerpe.
In de daog vaan ’t Acien Régime (frans veur ’t aajt bestuur vaan, veur de Franse Revolutie), had me in Mestreech veer Börgemeisters, twie vaan de Staotse of Braobantse kant en twie Börgemeisters vaan de Mestreech - Luikse kant.’t Nuie Fraankriek, boe Mestreech vaanaof 1794 deil oet van góng maake, zaog me ’n Börgemeister, ’t bestuurleke hoof vaan ‘n gemeinte. Heer woort benump door ’t centrale Staots- Gezag, wat veer noe de “Kroon” numme. Daorum kinne veer noe ouch stèlle tot Christiaan Coenegracht (1808-1815) den ‘ ierste echte beneumde Börgemeister vaan Mestreech waor. Emanuel Joseph Lefebvre (1800-1801) en Pierre Etienne Monachon (1801-1808) zien benump in ‘n zoegenaomde Pré-Historie periood, vaan ’t moderne Börgemeister-sjap dat veer noe nog kinne. De bezèttende Franse vervónge ‘t aw Vroedschap (college) door ‘ne Municipaal bestuur vaan 7 leie, boevaan ‘ne regerings-commissaris aon waor touwgevoog. De Municipaliteit (‘t gemeintebestuur) koos oet häör midde ‘ne president. Bonaparte vervóng dat door ‘n gehiel nui bestuurs-inriechting in ’t jaor 1800. De in deen tied gekoze Presidente kós me meujelek Börgemeister numme. Nao 1800 kaom ‘ne twie-ledig bestuur, ’t college vaan de Maire mèt twie adjuncten, en de Municipale Raod. Dat college vaan de Maire en zien Adjuncte kós ‘me e bitsje vergelieke mèt ’t huidige college vaan B en W, meh dat college stoond hielemaol neve de raod. Wel waor de Maire veurzitter vaan de Raod, meh zien adjuncten stoonte d ‘r hielemaol boete en mochte allein es plaots-vervèngend veurzitter bij de aofwezigheid vaan de Maire zellevers in de raod versjeine. Den ‘ierste Maire Emanuel Joseph Lefebvre, bleef mer ein jaor aon, en kraog toen ziene congé. De twiede accepteerde zien beneuming neet, en de derde, Pierre Etienne Monachon, waor einige jaore Maire en toen weer Adjunct-Maire. Um dee groond kin me stèlle tot Christiaan Coenegracht den ‘ierste echte börgemeister vaan Mestreech waor. Oondertösse waore de Franse verdwene oet Mestreech en huurde Mestreech weer bij ’t riek vaan Keunig Willem I. Dee beneumde op 16 Mei 1815 ‘ne veurluipig Stadsbestuur. Dat bestuur bestoond oet ‘ne College-Raod vaan 23 leie. Ein vaan de veer bestuurders waor ierste Börgemeister of Börgemeister-President, en de andere drei waore wie veer dat noe numme “ Wethouwers ” . In de Zuideleke Nederlande numde me die ouch “ Schepene “. ’t Waor ‘ne situatie zjus wie in Duitsland boe me noe nog altied ‘nen aontal Börgemeisters heet, en eine Ober-Börgemeister. De Börgemeisters-Veurzitters waore in deen tied A.C. Membrede, vaan 16 Mei 1815 tot 18 Augustus 1818, J.G.C. van Slijpe vaan 18 Augustus 1818 tot 31 Miert 1835 en Börgemeister Nierstrasz vaan 31 Miert 1835 tot 1 Fibberwarie 1850. In 1848 kraog us land ‘ne nuie groondwèt en oet dee groondwèt, is es organieke wèt, de gemeinte wèt oet oontstande. Dao-in is vasgestèld: de raod weurt gekoze, en de gekoze raod kees oet zien midde de Wèthouwers. Meh de Börgemeister, dee woort benump door de Keuning.
Emanuel Joseph Lefebvre. Börgemeister/Maire.  1800-1801. 1772-1828
Franse Soldaote in Mestreech 1800
Börgemeisters  & Gemeinteraod   in Mestreech. (Franse periood.)
Napoleon Bonaparte 1769-1821.
Franse Soldaote in Mestreech 1800
Napoleon Bonaparte 1769-1821.