Robert Graafland
Home Historie Artieste Bestuurders Febrikke Gouverneurs Kemedie Meziek Vollekstiepe De Werreke
In ’t jaor 1911 trouwde Robert Graafland met Maria Duquesne oet Hier, gebore op 2 Mei 1881 en gestorreve op 12 Juni 1956. De houweleks reis gong nao Italië. Zie kraoge in 1903 ‘ne dochter, Suzanne en in 1906 woort ‘ne zoon, Charles, gebore. In dat zelfde jaor vertrok Rob Graafland allein veur ‘ne studie-reis nao Amerika, en bleef dao ’nen aontal maonde woene. Wie heer weer trök waor in Mestreech kraog heer financiële probleme en mós heer zien eiges oontworpe hoes, gelege aon de Sjanerweeg, verkaope. Robert Graafland verhuisde toen mèt zien femilie nao Belsj, iers nao Luik meh daonao nao Wandre, dat gèt korter bij Mestreech laog. Heer bleef gewoen lès geve aon ’t Stads-Teikeninstituut en aon de Zoondags-sjaol. In 1911 verhuisde heer weer nao Sint-Pieter trök en zien hoes woort ‘ne plaots boe kunsteneers oet Mestreech ziech tege koumde. In deen periood braok de glorie-tied vaan Robert Graafland aon. Waor heer begós, met ‘ne Rembrandt achtige steil te sjèldere, noe waor heer oetgegreujd tot ‘ne romantische impressionist. Zien wèrreke riechde ziech op de sjoenegheid vaan ’t leve.Väöl vaan zien awwere deuk rampeneerde heer. In 1910 riechde heer, in kaffee Suisse oppe Vriethof, same met Jan Bakhoven, Guillaume Eberhard, Herman Gouwe, Henri Jonas, J.van der Kooy, Jos Narinx en Nic Reinders de Limburgse Kunskringk op. D’n ierste groete tentoenstèlling waor in Miert 1910 in de Dominicaner kerk. In 1912 kraog heer de Broonze Iere medaaje vaan de stad Amsterdam veur zien creatie “Lezend Meisje “ en in 1916 kraog heer vaan Keunigin Wilhelmina ‘ne gouwe medaaje.     
Robert Graafland 1875-1940
Rob Graafland is gebore in Mestreech op 26 November 1875 en gestorreve in Heerle op 28 Aprèl 1940. Ziene Pa, Joonkhier Johan Graafland, waor eigeneer vaan ‘ne baank meh ouch ‘ne heraldicus, dee twie geïllestreerde bookwèrke publiceerde naomelek “ Limburgsche Wapens” en ” Encyclopédie Héraldique “ die gesjreve waore in ’t Frans, en in ’t Hollands. Ouch maakde heer brandgesjèlderde houte waope-teleure mèt brandstif en kleure. In ’t jaor 1890 verhuisde de femilie Graafland vaan Mestreech nao Amsterdam boe Robert Graafland tegeliekertied de Rieksnormaal-Sjaol veur teikenoonderwijzers en de Quellinussjaol doorleep.In ’t jaor 1895 leet heer ziech insjrieve aon de Rijksacademie veur Beeldende kunste in Amsterdam. Dao waore zien liermeisters August Allebé en Carel Dake. Nao ziene studie kierde Rob Graafland in 1898 trök nao Mestreech en woort teikenlieraar aon ’t Stads-Teikeninstituut. Heer had dao twie bekinde collega’s naomelek, Frans van der Laar en Willem Sprenger. In deen tied waor in Mestreech wieneg of gein cultureel leve. Robert Graafland doceerde neet allein sjèlderskuns, meh ouch meziek en literatuur.   De gebreurs Mathias en Pierre Kemp die ouch lès kraoge vaan Rob Graafland, raakde daodoor mèt de kleingediechte vaan Guido Gezelle bekind en hadde ‘ne groete invlood op hun latere literaire oontwikkeling. Robert Graafland herkinde väöl talent in sommege lierlinge, en daorum riegde heer in 1902 ouch ‘ne Zoondags-Sjaol op. Decoratieve Kunste, um die talente dao-in beter en gratis te kinne oonderweize. Lierlinge vaan die Zoondags-Sjaol waore oonder aandere Edmond Bellefroid, Jan Grégoire, Charles Hollman, Han Jelinger en Henri Jonas. In de winter sjèlderde Rob Graafland en zien lierlinge in de Augustiene kerk, en in de zomer trokke zie ouch de natuur in, um “En Plein Air “ te sjèldere.Vaanaof 1911 sjèlderde zie in de Italiaanse tuin vaan Robert Graafland, gelege op Sint Pieter. 
Maria Graafland- Duquesne
Aw Maosbrögk  1906
Zomerweelde 1918
Robert Graafland in zien atelier. 1901
Robert Graafland Zelfportret 1900.
Lètste wèrk vaan Robert Graafland. 1940.
Es kunssjèlder woort heer erkind en bewoonderd, zien sjèlderije brach häöm reum in Limburg meh ouch in Holland. Daoneve waor heer gelökkig mèt zien ech en zien femilie. Robert Graafland had ummertouw e groete wèrk-lös, meh dao kaom opins ’n eind aon. Tegeslaag op finansjeel gebeed en ouch zien gezoondheid góng snel achteroet. Robert Graafland begós aon depressies te lije, die ummertouw dèkser trök kaomde. D’r waore daog tot Rob neet mie kós wèrke, en daog woorte maonde en jaore. In November 1919 woort heer op veerenveertig jaorige leeftied iervol zien pensjoen verliend. Op 29 Augustus verhuisde de familie Graafland vaan Sint Pieter nao Sint Servaoskloester nommer 23, in Mestreech. In 1933 bereikde de mismeujetegheid vaan Robert Graafland e hoegtepunt. Heer staok ziech zellefers ’n oug oet en verloor zoe zien rechter oug. Robert woort in Apeldoorn opgenome, en daonao weijer in Vucht. Nao e krèngde vaan veertien jaor waor Robert  geneze verklaord en kraog heer weer plezeer um  te goon sjèldere. Meh heer waor de Robert Graafland vaan vreuger neet mie. In 1940 kraog Robert Graafland ‘nen ernstege krenkde. In korte tied verzwaakde heer en kós bekans neet mie sjèldere. Zien lètste sjèlderijj waor ‘ne gesluijerde broet, mèt e boekèt blomme in häör same gevouwde han, wat heer evels neet mie heet kinne aofmake. Robert Graafland woort veur ‘nen opperasie opgenome in ’t Sint Joseph hospitaol in Heerle. Dao is heer evels oonder de opperasie gestorreve, en wel op Zoondag 28 Aprèl 1940.
Zelfportret 1936.
Graafmonumint Robert Graafland