Home Historie Artieste Bestuurders Febrikke Gouverneurs Kemedie Meziek Vollekstiepe De Werreke
 
Edmond Hustinx
Joseph,Marie,Hubert,Edmond Hustinx 1898-1984
Joseph, Marie, Hubert, Edmond Hustinx is gebore in Mestreech op 30 November 1898 en gestorreve op 6 September 1984 in Venlo. De awwers vaan Edmond Hustings waore, Theodorus Petrus Hustinx gebore in Mestreech op 16 juli 1855, en is gestorreve in Mestreech op 8 januari 1937. Heer waor zeipfabrikant, en trouwde mèt Maria Gertrudis Hubertina Felicite Cuijpers, en is gestorreve  in Amstenrade op 3 juni 1927. Zie waor 'n dochter vaan Joannes Matheus Cuijpers en Maria Theresia Paulussen. Oet de ech vaan Theodorus en Maria woorte 8 kinder gebore; 1.Marie Joseph Hubert Mathieu Hustinx, gebore in Mestreech op 21 maart 1891. 2.Henriette Marie Hubertine Hustinx gebore in Mestreech op 24 mei 1893. Zie waor docente aon de Academie Beeldende Kunsten vaan de Hogeschool Maastricht. 3.Marie Hubert Alphonse Eugene Emile Hustinx geboren in Mestreech op 1 November 1894. 4.Felicite Hubertine Marie Jeane Hustinx gebore in Mestreech op 6 juli 1896, trouwde op 20 augustus 1921 mèt Gustave Constant Antoine Hubert Corten,gebore in Beek op 29 december 1889, en is gestorreve in Venlo op 14 mei 1947. Heer waor 'ne zoon vaan Gabriel Henricus Hubertus Corten en Maria Hubertina Clementina Rutten. 5.Joseph Marie Hubert Edmond Hustinx gebore in Mestreech op 30 november 1898, en gestorreve in  Venlo op 20 mei 1984. Heer waor oongetrouwd en woende same mèt zien zuster in 't awwelek hoes.  6.Marie Hubertine Eugenie Hustinx gebore in Mestreech op 14 oktober 1900. 7.Marie Hubert Pierre Hustinx gebore in Mestreech op 30 juli 1902, en gestorreve in  Nijmegen op 19 september 1983. 8.Marie Hubert Marcel Hustinx gebore in Mestreech op 13 jannewarie 1905, en gestorreve in Mestreech op 27 September 1981.
Tösse 1923 en 1927 maakde heer opmèrkeleke kriet-teikeninge vaan stads geziechte en landsjappe, boein heer door gebruuk te make kleure en lijne, ’ne persoenelek karakter aon gaof. Later maakde heer ouch gebruuk vaan olieverf. Edmond Hustinx had iers in Amsterdam geneeskunde gestudeerd, meh dee heet heer neet aofgemaak. Heer vervolgde zien studie mèt filosofie en chemie. De studie vaan chemie kaom häöm later weer vaan pas, wie heer in 1931 ’t zeipfebrik  “ Zeepfabriek Hustinx NV” vaan ziene Pa euvernaom. ’t Febrik waor iers gelege aon de Luregraof, meh woort later euvergebrach nao Bosserveld. Tot aon ’t oetbreke vaan de twiede wereld-oorlog verleep de productie vaan zeip good, meh daonao woort ’t ummertouw lèstiger um aon groond-stoffe te kaome. Heer góng toen euver tot ’t fabrisere vaan surrogaat, en dat waor ‘nen ierste aonzat tot ’t ontwikkele vaan moderne syntetische wasmiddele. Oonder zien leiding greujde ’t febrik oet tot ‘nen internationaol bedrief mèt febrikke in ’t binne en boeteland. D’n inventieve persoenelikheid vaan Edmond Hustinx kaom nao väöre in de oetvindinge die heer deeg. Heer deeg vindinge oonder aandere in de soda- fabricage en ‘ne nuie bereiding vaan waterglaas. In 1961 riechde heer de stiegting “ Edmond Hustinx “ op, um de kunste en weitensjappe in Mestreech te stimulere. De stiegting riekde vaanaof 1966 al ‘nen aontal prijze oet aon jong kunsteneers. ’t Bestuur vaan de stiechting wel mèt dee pries kunsteneers die in Mestreech of oet de regio en neet awwer zien es 35 jaor stimulere. De zjury lèt ummertouw dr’op tot de pries winnaars ‘nen eige herkinbare stijl höbbe oontwikkeld, en wèrke make vaan 'ne hoege kwaliteit.
Edmond Hustinx
Woen en geboortehoes vaan Edmond Hustinx. Luregraof.
Edmond waor neet getrouwd en woende same mèt drei oongetrouwde breurs en ein oongetrouwde zuster aon de Luurdersgrach. Me kinde in dat gezin neet al te väöl luxe. Edmond Hustinx leefde in ‘ne wereld, boe in heer veur ziech zellevers ‘ne rol had gemaak, en boemèt heer sómmege lui imponeerde en aander weer ammuseerde. ’t Waor veur ‘nen aontal lui neet altied eve dudelek boe de werkelekheid opheel, en de fantasie begós wienie Edmond Hustinx ’t euver ziech zellevers had. Meh ummertouw verbaasde heer zien umgeving door zien originele meininge en praktiese invalle op versjèllende maotsjappeleke terreine. Bewoonderensweerdeg waor ouch zien couraasj um te perbere um nui ideeën werkelek veurein te kriege. Edmond waor gruuts dr’op um es kleine fabrikant, ieder en miejer ’t bevordere en stimulere vaan kunste en wetensjappe deeg, daan minneg aander groete industrie.Wie heer prijze oetreikde of leet oetreike, aon ierste klas kunsteneers of wetensjappers, straolde heer ouch e bitsje zien talente op hun aof. En wee bij häöm aonklopde veur steun veur ‘ne culturele activiteit, kaom noets veur niks bij häöm aon de deur. Op artestiek gebeed waor Edmond Hustinx ‘nen ammeteur in de gunstige beteikenis vaan ’t woord. Meziek make, filme, foto’s trèkke en sjèldere besjouwde heer es ‘ne vorm vaan oontspanning, en um te koume tot nui gedachte. De ierste teiken-lèsse kraog heer in 1915 es lierling vaan ’t Canisius-college in Nijmege, vaan Eugène Lücker. Oet dee periood dateert e fraoj geaquarelleerd stèlleve vaan ‘ne sigaredoes en ‘ne serie pen-teikeninge vaan vogel-studies.