Home Historie Artieste Bestuurders Febrikke Gouverneurs Kemedie Meziek Vollekstiepe De Werreke
Johnny Blenco
Johnny Blenco
Johnny Blenco (Jozef Vriezelaar) vreuger de Zingende Glazewasser, en zènger vaan 't Mestreechter leed, greujde op in 't Boschstraot keteer. Nen’arbeiders buurt en neet wied vaan de Stokstraot. Es jong junkske moos heer dèks ziene Pa goon hole, dee in 'ne kaffee in  de Stokstraot ummertouw zien gleeske beer zaot te drinke. Wie heer ziene Pa góng hole, zaog heer dèks wie dao Lang Lies of Roei Tina  aon de gèng waore um klante nao binne te lokke. Op verzeuk vaan de aw Stokstraot bewoeners  heet Johnny Blenco  e leedsje euver die aw Stokstraot gesjreve, boe heer  euver de kaffees en de bezeukers en de lui mèt hun bij naome zóng. Johnny Blenco heet  jaore laank bij de platefirma Telstar vaan Johnny Hoes gewèrk en dao väöl plate gemaak, dèks oonder 'nen aandere naom zoe wie De Mosselmannekes, Johnny Hot, Theo & de Afzwajers, Jan Patat, enz. Die plate woorte veural in Beljz good verkoch en umtot zie ouch neet zoe deur waore. In de begin periood  maakde heer ouch väöl Vastelaovends meziek same mèt Sjeng Kraft o.a. de L.P.s  Drei Daog Karneval in Mestreech en Vastelaovend in Limburg. Bekinde Mestreechse nommers oet deen tied waore,Tant Neske, De Meitskes vaan Mestreech, Aria van Maria , en netuurlek 't clubleed vaan MVV. Zien groetste suksès waor in Mestreech in 1973 wie ziene L.P. vaan op  't Vriethof op 'n Baank die bij de platemaotsjappij  vaan Dureco oetkaom. Heer promote die plaat en trooi dèks op in de Groete Staat veur de V&D  op 'ne Zaoterdag middag mèt ziene gitaar.                                                               
Die  ierste weke leep 't störm mèt de verkaop vaan de L.P. en al gouw waor de L.P. good veur 'ne gouwe plaat. De bekindste nómmers  vaan die plaat zien,  Heimwee naor  Mestreech, 't Hart vaan Mestreech, Es tiech mich puuns Merie, en Iech höb de piep leeg. 'n Jaor daonao kaom 'n  Keers plaat vaan häöm oet naomelek   " Keersmès roond de Vriethof " en ouch dee plaat woort 'n groet sukses. Bekinde nómmers zien hei vaan, Belkes hei Belkes dao, Keersmès roond 't Vriethof, Op de Amiejer Heij enz.. De C.D./ plaat is oetgebrach bij de firma Dureco. In 1981 maakde heer de L.P. Mestreech blijf toch Mestreech. Johnny Blenco is neet allein zènger meh ouch arranzjeur, producer, en songsjeiver. Veur Sjeng de Belsjz  heet heer 'n aontal leedsjes gesjreve, Dao moot op gedroonke weure" en "Es de roeze weer goon bleuje", in 2000,  " Es iech in dien auge kiek "  en " Griekse vrouwlui ".  sloog in wie 'ne  bom, en woort op alle radio zenders gedrejd, en 't heet zellevers 'n  een aontal kiere de tèllevisie gehaold. In 't jaor 1999 maakde heer veur 't iers 'n C.D.  mèt zien dochter Marjo, naomelek Te Sjoen um Woer te zien. E jaor later in 2000 kaom de C.D. "Höb geer effe tied en in 2002  Dee Sjoenen tied .'t Bekinste nommer  is zier zeker vaan "Ich höb vaan diech gehawwe”  Same mèt zien dochter Marjo  vörmde heer ouch oonder de naom vaan "Het Noorderzee-Duo" . Zie naome  e videoclip op mèt 't leedsje  "Ik heb van jou gehouden", 'ne holladse teks vaan 't leedsje " Deen sjoenen Tied ".
Same mèt de gróp Pikkatrillaz maakde heer in 2007 e Vastelaovends rap-pleetsje naomelek , Hi Ha Rappening en dat woort väöl mèt de Vastelaovend gedrejd. Hi Ha Happening is e leedsje oet 1962. Johnny Blenco is 'ne groete Mestreechse zènger boe veer bezunder gruuts op mage zien umtot heer väöl heet touwgevoog, zoewel es zènger, arranzjeur, en componis aon de in  't Mestreechs gezónge  leedsjes.
Op ‘t Vriethof op ‘n baank.1973