Home Historie Artieste Bestuurders Febrikke Gouverneurs Kemedie Meziek Vollekstiepe De Werreke
Paul Chambille de Beaumont 1889-1968
                               Paul Paulus Carolus (Pol) Chambille is gebore op 11 Oktober 1889 in Mestreech, en gestorreve in Mestreech op 6 Jannewarie 1968. Pol Chambille trouwde op 6 November 1917, mèt  Virginie Alexandrine Marie De Beaumont, gebore op 28 December 1891 en gestorreve in Mestreech op 31 Miert 1979. Zie waor e dochter vaan Henricus Josephus Hubertus De Beaumont  en Eugénie Marie Léonie Joffroy. De awwers vaan Pol Chambille waore, Hendricus Carolus Chambille gebore in Mestreech op 11 Augustus 1863, en gestorreve in Mestreech op 20 Juni 1906. Heer waor mèt eigeneer vaan Brouwerij “ De Hoop “. Heer trouwde in Mestreech op 31 Mei 1887 mèt Antoinette Marie Hubertine Lambertine van Aubel. Gebore in Mestreech op 27 Miert 1864, en gestorreve in Mestreech op 20 September 1951. Oet de ech woorte twie kinder gebore: 1. Jeanne Marie Isabelle Chambille.Gebore op 22 Fibberwarie 1888 en gestorreve op 15 Juni 1971. 2. Paulus Carolus Chambille. Gebore op 11 Oktober 1889 en gestorreve op 6 Jannewarie 1968. De awwers vaan Paul Chambille koume veur oet 'ne veuraonstaonde brouwers-femilie. Oet de ech vaan Paul Chambille en Virginie De Beaumont woorte vijf kinder gebore. 1. Antoinette Charlotte Maria Henriette Chambille. 2. Dieudonneé Marie José Therèse Chambille. 3. Henri (Hais)  Chambille. 4. Eugenie Josephine Marie Theresia Chambille. 5. Marie José Thérèse Chambille.
Naotot Paul en Virginie getrouwt waore numde Paul ziech, Paul Chambille de Beaumont. Pol waor vief en twintig jaor laank dirrekteur vaan brouwerij  “ De Leeuw “oet Valkeberg. Direkteur Frans Smeets vaan de Leeuwbrouwerij storf op 18 Novenber 1932 en op 28 Mei kaom de leiding in han vaan e dirrekteurs duo; Jan Philips kraog de administrative leiding en Pol Chambille woort technisch- commerciëel leier. De twie direkteure leide de Valkebergse brouwerij door de meujeleke daartiger jaore. Allewel de tied neet veurdeilig waor, góng de nui directie door mèt investere. D'r kaom e nui gebouw mèt dao in ruimte veur kentoere, laboratorium, expeditie, wèrkplaotse, maggezijne en garage. In juli 1936 woorte die fiestelek in gebruuk genome. Oeteraard verleep de stijging vaan de beer-umzat in die jaore neet ummertouw in 'ne stijgende lijn. Aon de veuraovend vaan de twiede wereld-oorlog woort 't ummertouw lèstiger um aon groondstoffe te kaome um beer te kinne brouwe. Nao d'n oorlog woort 't jaor 1944/1945 e record jaor veur De Leeuw. De produktie góng omhoeg tot 40.000 hl. Meh 't einde vaan d'n oorlog waor ouch ne ramp veur de brouwerij. De trök trèkkende Duitsers lete de brök euver de Geulle springe , boebij de brouwerijgebouwe väöl sjaoj oplepe. Ouch veel 'ne brandende bezinetank, oet e vleegmesjien op 't nuie gebouw, dat toen aofbrande. 't Archief, kentoer en wèrkplaots mèt veurraode gónge verlore. Lankzaam góng 't gèt beter mèt de Brouwerij, meh 't doorde nog tot 1960 ier me kós zègke tot 't weer good góng mèt brouwerrij De Leeuw. Op 1 Mei 1958 maakde Pol Chambille en Philips plaots veur hun opvolgers en wel veur ziene zoon Hais Chambille en Jan Schreurs. In deen tied woort e nui beer op de merret gebrach: Super Leeuw, e bloond beer mèt e gèt hoeger alcoholpercentage vaan 't Dortmunder-type. 't Beer woort op de Olympiade in Brussel op 6 Jannewarie 1962 mèt de hoechste  pries bekroend.  Neve 't direkteursjap had Pol Chambille nog tied euver veur zien leefhöbberij mèt zien compassie veur de chariteit. Ein vaan zien leefhöbberij waor de Vastelaovend. Nao d'n twiede wereld oorlog riechde heer same mèt Frans Thewissen  in 1945 de Vastelaovends vereiniging de Tempeleers op, boe de chariteit 'ne belaankrieke plaots kraog. Nen aandere groete  leefhöbberij vaan Pol waor de meziek en de Mestreechter taol. Jaore laank waor heer praeses vaan de Mastrichter Fanfaar Sint Joezep.
Mastrichter Fanfaar Sint Joezep.
Zien groetste leefhöbberij waor evels de Mestreechter taol mèt 't make of sjrieve vaan leedsjes en gediechte. Me kin Pol Chambille mèt rech 'ne Volksdiechter numme. Heer sjreef gediechskes en leedsjes zoonder literair prittentie. De reie um zien ierste beukskes oet te geve, waor daan ouch neet zien ambitie um es sjrijver bekind te weure, meh um cent  op te hole veur de chariteit. In zien vreugwerk vint me veurnaomelek leedtekste op bestaonde wijs, en gediechte euver actueel oonderwerpe. Es veurbeeld vaan 't ierste e stökske oet de mestreechter teks dee heer maakde op 't Liburgs Volksleed.
Mestreechs Volksleed Boe me ouch e täölke sprik, vol vaan geistigheid. Boe et hertsje euverlöp, vaan verdraagzaamheid. Boe me trouw blijf aon zien stad, aon taol vaan Peer en Meer. Dao ís et Vaderland, vaan de Mastreechteneer.
De Pisbak 1927
Pol Chambille heet 'nen aontal bóndel gesjreve vaan gediechte en bedeende ziech dèks vaan versjèllende veersvörme en rijmsjema's. E groet gedeilte vaan 't werk vaan Pol Chambille, leedsjes en gediechte, is oetgegeve in beukskes en kajee's. 't Veldeke heet in 't verleie väöl werk vaan häöm in 't tiedsjrift  gepubliceerd. In zien gediechte sjreef heer dèks euver oonderwerrepe die de bewoeners vaan Mestreech bezeg heelde, en leet dao-in zien leefde veur Mestreech zien. Heer sjreef oonder aandere euver 't aofbreke vaan de Aw Maosbrögk, d'n awwe pisbak oppe Merret, 't bezeuk vaan de Keunigin aon Mestreech, en umtot me 't Tejater hernumde tot “ Schouwburg “ !! Oet 't gediech vaan 't tejater, 't volgende fragmint:
‘t Tejater Weer gèt nuits Mestreechtenere ! den tejater heet gedoon. Es geer opera's wèlt loere, moot geer nao de Schouwburg goon. Neet entrée mie des artistes, de benaoming maak uuch sjeel. Kunstemakers, grappemakers, naar den toegang tot toneel !!
Leedsjes Cahier.
Es me 't latere wèrk vaan Pol Chambille leus, vèlt op tot zien gediechte oersprunkeleker en gèt besjouwender weure. 't Wèrk vaan Pol woort ouch door zien tiedgenote op pries gestèld. In zien blomlezing vaan “Mestreechter Spraok en Zeute Taol “, oet 1933, gaof H.J.E. Endepols häöm e pläötske in 't hoofstök  “Joonk Leech”,  allewel tot op dat momint nog mer eine bóndel veerze vaan häöm waor versjeind. Wie Pol Chambille in 1956 tot ierebörger vaan Mestreech woort benump, sjreef Vic Reinders e gediech euver häöm.                                                                                              Maan vaan 't Vollek vaan Treech, altied gebleve,                                                                                              diechter en brouwer, en maan vaan chariteit.                                                                                              Dat alles völde en völt nog gans zien leve,                                                                                              zoe vol meziek vaan eerds en hiemelheid. Paul Paulus Carolus (Pol) Chambille is gestorreve op 6 Jannewarie 1968 in de leeftied vaan 78 jaor. Heer waor ierebörger vaan de stad Mestreech, en Ridder in de Orde vaan Silvester.
Hais Cambille.
Ridder in de Orde vaan Silvester.
Pol Chambille
Paul Chambille