Home Historie Artieste Bestuurders Febrikke Gouverneurs Kemedie Meziek Vollekstiepe De Werreke
Rika Cesarin
In de crisis jaore vlak veur d’n twiede wereldoorlog koam Rika Cesarin mèt häöre maan en drei kinder nao Mestreech, um hei e nui bestoon op te bouwe. Zie bookde e kemerke, dat neet al te deur waor, in hotel De Zwaan, gelege in ’t Stokstraot keteer. Europa zaot in’ne depe crisis zoe vlak veur d’n twiede wereldoorlog. Dee economische crisis of depressie waor vaan invlood op de leve en werk, en boevaan me in ’t Stokstraot keteer in Mestreech ’t mies te lije had. In Amerika hadde de boere  ‘nen euverproductie, boedoor de prijze daolde. ’t Zörgde veur groete sjölde zoetot  de baanke weer in probleme woorte gebrach. ’t Gevolg waor tot economie in Amerika in de probleme kaom. Ouch mèt de industrie waor ’t, ‘t zelfde verhaol. De loene stijgde neet mie, en de lui verdeende neet genóg um normaal te kinne leve. Ouch Nederland veel daodoor  in ‘ne crisis, en de angst en ‘t gedach veur ‘nen oorlog. ’t Waor veur de femilie Cesarin e zwoer bestoon die ierste jaore. Werk vinde waor bezunder lèstig en Gino Cesarin dee vaan beroop mozaiek-lègker waor, deeg noe  alderlij aander klus-wèrke bij  lui, um mer gèt cent te kinne bij verdene. Umtot ze zoonder werk zaote waor ouch ne reie um te verhuize nao ‘ne goojekouper oonderkaome. Zie voonte e woening mèt e paar klein kemerkes in ’t Stokstraot keteer op nommer 37. Nen aontal Mestreechtenere loerde e bitsje vreemd tege die Italiane aon, die de Nederlandse of Mestreechter taol gaar oet neet mechteg waore. ’t Klusse lieverde neet bezunder väöl op, en zie mooste weijer op zeuk nao gèt aanders goon, um cent te kinne verdene. Zoe perbeerde Rika deur aon deur pinda’s te verkaope um mer gèt te kinne verdene. Mer ouch die verdeenste waor neet genóg en zie góng neve de pinda’s ouch vès verkaope. In die jaore waor de  vès nog gooijekaop ete, en de lui aote dèks op vriedag  gezwolde eerappele mèt vès (hiering). Zoe góng Rika miestal op goonsdag en vriedag de hoezer en kaffee’s langs, um mèt die daog vès te kinne verkaope aon de lui. D’n oorlog waor veurbij en laankzaam herstelde de economie ziech weer, ouch in Mestreech. ‘ Nen aontal jaore daonao opende Rika Cesarin ‘ne Frituur en Iessalon aon de Toongersestraot 7, oonder de naom vaan “Milano”. De zaak leep nao behure en veural in de weekends waor ’t behuurlek drök. Väöl lui gónge naotot zie op stap waore gewees in kaffee’s vlak in de buurt, eve bij Rika langs um nog e tuutsje friet te ete. Meh dat waor neet altied veur ederein eve gemekelek !!
Manslui die ne baard of knievel hadde, woorte dèks slech of neet geholpe door Rika. Zie voond dat mer oonverzörgd en vies . Zie zag daan tege dee persoen, tot heer ziech n’s good mós sjere of verzörge !! Tege 'ne maan mèt 'ne knievel zag ze altied : 'lelijke man' ! Meh tege 'ne maan zoonder knievel zag ze : 'mooie man'.  Rika had ouch ‘ne groete hobby en dat waor ‘t Keuninklek hoes. Es iemes vaan ’t Keuniklek Hoes Mestreech bezeukde, daan stoont Rika ummertouw veuraon, um häör of häöm te komplementere en ‘ne hand te geve. Bove de frietebak in häöre frituur, hóng ’t vol mèt foto’s vaan, Juliana, Bernhard, Beatrix en Claus en Willem Alexander. In 1994 woort zie beloend mèt ‘ne keuninkleke oondersjeiding. Dee oondersjeiding hong ouch aon de moer zoetot ederein ze good kós zien. ’t Sjoenste wat Rika kós euverkaome waor, wie  Paus  Johannes Paulus II, op 14 Mei 1985, nao Mestreech kaom. Heer zouw um nege oor in Mestreech zien, meh Rika voont ’t nudig um den ‘aovend dao veur al bij de kerk te goon stoon. Same mèt häör dochter Maria, stoond zie achter e strankètsel de ganse nacht te wachte. Den daag daonao woort zie veur ’t lange wachte beloend. Wie ze de Paus zaog, schrieuwde ze zoe hel, tot de Paus häör wel neet kós euverzien. Zie kraog de zegen en ‘ne hand vaan Paus Johannes Paulus II. Dat kaom s’aovends op de T.V. en zie had dao ouch ‘ne foto in häör frietuur vaan op laote haange. Rika Cesarin heet ouch in ‘ne film mèt gespäöld, naomelek in de film vaan Commissaris Fanfaron en de Poesjenellenmoord.’t Waor ‘ne film vaan Math van Even oet 1981. Later is dee film ouch op ‘ne D.V.D. gezat. ’t Waor ‘ne film,  gefilmd in Mestreechter kaffee’s en aander horeca’s en in de Poesjenellekelder vaan ’t Poppetejater vaan Pieke Dassen. Väöl bekinde Mestreechtenere späölde dao in mèt wie Frank Smits,’nen aontal bekinde stamgaste vaan Kaffee den Tribunal en Rika Cesarin netuurlek. Rika Cesarin-Nadal is in 2004 gestorve.
Rika Cesarin-Hadel
Rika Cesarin
De Stokstraot 1930
Iessalon Frituur Milano