Home Historie Artieste Bestuurders Febrikke Gouverneurs Kemedie Meziek Vollekstiepe De Werreke
Bosch Poort
Fuselier 1757
Soldaot 1618
Kaart 1670
Bosch Poort Stads Kant Alexander Schaepkens 1867
Bosch Poort Veld kant Alexander Schaepkens 1867
In ‘t noorde vaan de stad leep e weeg riechting Hocht en s’ Hertogenbosch. Hocht waor e klein dörrepke (Neerharen-Lanaken) dat noord-westelek vaan Mestreech laog. Bij d’n ierste umwalling kós me de stad inkaome of weer verlaote via de Hochterpoort. Neve de Hochterpoort waor nog ‘ne kleinere poort, dee me ouch de kleine Leugepoort neumde, en dee me lang es gevaangenis heet gebruuk. De (Alde) Hochterpoort laog kort bij de Groete en Kleine Grach. Dat waore grachte die door de hoegere ligking bekaans ummertouw druug stoonte. Ouch de Alde Hochterpoort woort gebruuk vaanaof 1306  es gevaangenis. De poort woort al in ’t jaor 1231 genump. Es me ‘n nuie Proost vaan ’t Sint-Servaas binnehaolde, woorte de gevaangene vrij gelaote. Meh, zie mooste wel iers mèt dee stoet vaan de nuie Proost, op bloete veu veurop laope. Heer of zie had ‘ne groete bougie in hun han, en waor gekleid in ‘ne difflamerend  wit linne kleid. De Hochterpoort woort in 1632 aofgebroke en me gebruukde de stein, veur de bouw en de fundering vaan ’t nui te bouwe stadhoes (1659-1664) , oontworpe door Pieter Post. Wie me d’n twiede umwalling had gebouwd, kós me de stad oonder aandere verlaote langs de Boschpoort. De Boschpoort woort in deen tied ouch wel de nuie Hochterpoort genump. De poort is naoventrint ’t jaor 1300 gebouwd en woort veur ’t iers genump in ’t jaor 1316. De Boschstraot waor in de middeliewe ‘ne werkstraot mèt alderleij handel. In deen tied woort ’t mieste dao d’n hout handel bedreve. Me numde dat gedeilte vaan de  straot, dat zjus boete den’ ierste umwalling laog, ouch wel de hout merret. In ’t jaor 1502 woort de Boschpoort,  dee ter huugde vaan boe noe de Sphinx steit,  herstèld door arsjitek Conrad van Noerenborch. Heer lieverde evels slech werk, umtot de poort al e jaor daonao begós te verzakke. De poort kós me mèt de groetste meujte weer herstelle, meh dao zaote ouch groete koste aon verboonde. De bouwmeister woort veur dat slech werk, veur iewig de stad oet verbanne. Tijdens ’t belègk in 1579 door de Hertog vaan  Parma, mèt zien Spaonse soldaote, woorte de twie torens kapot gesjote en later neet mie opgebouwd. De Boschpoort waor same mèt de Brusselse poort, de drökste poort vaan Mestreech. In 1632 woort de poort gèt breijer gemaak, zoetot de boere mèt hun hui-wagele beter d’r door koste goon. In ’t jaor 1869-1870 woort de Boschpoort aofgebroke um plaots te make veur woeninge en febrikke.
Kaart Mestreech 1670. Good te zien, zien de boete-verdeidigings werreke, um de verdeidigings-poorte te versterke, die door Frederik Hendrik vaanaof 1632 zien aongelag.
Poortbreef Bij edere Stads-poort hong me e beriech of ‘nen annaos,boe me ‘ne melling maakde vaan nui regels,prijze, tijing enz.  ‘t Waor zoegezach e nuits breef veur de bezeukers of bewoeners (poorters) vaan de stad. Bovestaonde ‘n annaos oet 1796.
Deil vaan de verdeidigings moer aon de weskant vaan de Boschpoort oet 1860. Good is te zien tot me in de 17e iew ‘nen eerde wal had aongelag um de helf vaan de moer te bedèkke. Oonderaon kin me de Cunette zien die me aongelag had ,um de grachte vaan water oet de Jeker, te veurzeen.