Home Historie Artieste Bestuurders Febrikke Gouverneurs Kemedie Meziek Vollekstiepe De Werreke
 
Brouwerij   De Ridder
                                                               Gebroeders van Aubel Bierbrouwerij. De Ridder voont zien oersprunk in Retersbeek, gelege tösse Heerle en Klimme. In 'n pand  gelege aon 't begin vaan dat dörrep, woort veur 't iers in 1825 Ridderbeer gebrouwd. Later woort in 1857 't beermerk “De Ridder” verkoch aon de femilie Van Aubel. In 't jaor 1857 stiechde de gebreurs, Louis en Joseph van Aubel in Mestreech, de brouwerij  “ Gebroeders van Aubel Bierbrouwerij ” . Iers in de Rechstraot en later, nao 1900 aon den’ Oeverwal. De naom woort in 1925 gewijzeg in “Brouwerij De Ridder”. Vijf geslachder laank vörmde de femilie van Aubel de directie vaan dees brouwerij. In 1982 kaom de brouwerij De Ridder in han vaan Heineken Nederland. De gebreurs van Aubel hadden in deen tied vaan umtrint 1857, ouch al brouwerije in Roermond en Meerse. Mestreech had in de 19e iew, mie es 40 brouwerije in de stad, meh dat leep in 1914 sterk trök tot 24 Brouwerije. Nao d'n twiede wereldoorlog waore dat d'r nog mer 9, boe vaan oonder aandere twie kloester-brouwerije. 't Doorde neet lang of die twie kloester-brouwerije stopde ouch demèt, en ouch de Brouwers Eberhard, Th. Grein en Eugène Marres stopde nao d'n Twiede Wereldoorlog. Zoe ouch Brouwerij De Zwarte Ruiter gelege aon de Annalaon, Marres-Ceulen in de Capucijnestraot, en in 1971 in Wiek, Brouwerij De Keizer N.A.Bosch gelege aon de Wieker Grachstraot. Zoe bleef De Ridder brouwerij es einigste nog euver en specializeerde ziech in bere vaan  hoege gisting.
In de jaore 1900 waor de concurrentie groet umtot Mestreech toen 26 Brouwerije had. In 1925, nao de umsjakeling op de liege gisting, brach de brouwerij beer op de merret oonder de naom vaan Ridderpils. Vijf jaor later in 1930 kraog de brouwerij dezelfde naom, en wel  vaan Brouwerij De Ridder. Me nump aon tot dee naom aofgekaome is vaan Sint Martinus, ridder en petroenheilige vaan de kèrk vaan Wiek, neve de Brouwerij. Ouch is de Ridder trök te vinde op 't beeld-merk vaan Stadsbrouwerij De Ridder. De Ridder waor ouch ein vaan de ierste brouwerij dee haor beer exporteerde. De Ridder woort in 1982 euvergenome door 't Heinekens-concern. Op dat momint brouwde De Ridder drei soorte beer. 't Pils vaan van Aubel (vaanaof 1925), 't Oud Bruin, en 'n Maltezer beer. In 't Pilsner beer gebruukde me mer wieneg groof graone en 't had 'n gooi hop-bitterheid. In 1987 woort veur 't iers nao väöl jaore weer Bock-beer gebrouwe. En e jaor later brouwde me in 1988 veur 't iers Wieckse Witte.  't Mestreechs witbeer brouwde me neet allein veur de Ridder kaffee's, meh ouch veur Heineke kaffee's. 't Door de Brouwmeister Wim van Wijk gebrouwde beer waor e groet suksès, en woort  mèt häör productie twiede op de wit-beer-merret vaan Nederland. Umtot evels neet miejer es 100.000 liter in Mestreech gebrouwe kós weure, woort e gedeilte vaan 't Witbeer door de Paoters Trappiste in Tilburg gebrouwe, en in de brouwerij vaan Schiltigheim Duitsland, dat ouch e Heinekensdochter is. In 1994 brach me 't beer Vos, um zoe te kinne concurrere mèt 't bekinde Palm beer.
't Waor e amber-kleureg beer vaan 'n hoege gisting, mèt e klein aondeil vaan sokker. Op 1 Miert 2002 stopde de Brouwerij mèt 't brouwe vaan pils, aajt, broen en bokbeer. 't Besluut um te stoppe waor e gevolg vaan oonder aandere 't vermoge um neet miejer beer te kinne brouwe. Ouch umtot me neet kós oetbreie, zoetot de productie beperk bleef tot 100.000 hl. Logistieke probleme waore d'r ouch. Groete vate en fuste móste in Groonsveld op kleinere vrachwagele weure euvergelaoje, umtot die groete vrachwagele neet door de klein straote vaan Mestreech, wie de Oeverwal kóste rije. Daoneve waor de Gemeinte vaan meining um de wiek boe de brouwerij ligk, verkiers- vrij te make. Heineken brach de productie vaan Wieckse Witte, euver vaan Mestreech nao Den Bosch, en 24 maan kraoge toen hunne congé.
Jef van Aubel.