Home Historie Artieste Bestuurders Febrikke Gouverneurs Kemedie Meziek Vollekstiepe De Werreke
    Jaques de Fariaux
Jaques de Fariaux Gouverneur 1673.
Jaques (Jacob) de Fariaux, Burggraaf van Maulde is gebore op 8 Jannewarie 1627 in Bergen (Mons), Henegouwen, en gestorreve op 26 Aprèl 1695 in Ath. Ath is e kleine Waolese stad in 't Noorde vaan de Belzje provincie Henegouwen. Heer góng al op jonge leeftied es soldaot in deens vaan de Spaonse tróppe. Jaques de Fariaux waor 'n edelmaan oet Bergen (Mons), en waor ein vaan de bèste offesere in 't leger vaan de Spaonse Nederlande. Heer maakde naom tijdens de Spaons-Franse oorloge, en naom oonder aandere deil aon 't belèk vaan Valenciennes in 1656. Weijer deeg heer mèt aon 'n expeditie in Portugal in 't jaor 1662, en bij 't belèk vaan Vila-Vicosa in 1667. Jaques de Fariaux woort al snel bevorderd tot Kolonel vaan 'n infanterie regimint, mèt de rang vaan Generaol. Heer woort bevorderd op groond vaan zien ervaring, umtot heer deil naom aon drei groete veldsleeg en 19 belegeringe. De Staten Generaal benumde haom in 1673 tot Gouverneur vaan Mestreech. De Vesting Mestreech woort in deen tied besjouwd es 't belaankriekste bolwerk vaan de Republiek der Verenigde Nederlande, tege de aonvalle vaan oet 't zuide. Naotot de oorlogs- verklaoring vaan de Franse Keuning in 1672 aon de Nederlande waor gedoon, woort de vestings-stad Mestreech in 'ne groete häös versterk. d'r Woort e groet Garnizoen gelegerd vaan 9.000 maan, en de stad woort veurzeen vaan genóg keugel, en proviand, um 'n belèk vaan 'nen aontal maonde te kinne  doorstoon. Mestreech woort evels vaan de boetewereld aofgeslote, en Lodewijk XIV naom e groet gedeilte vaan de Republiek in bezit. Óndertösse veel de  Stadhouder vaan de Nederlande, Prins Willem III, Charleroi aon, boe de Franse groete veurraode veur hun tróppe hadde aongelag. Kleine Cavalerie Compagnieën vaan 't Mestreechs garnizoen, oondernaome struip-tochte in 't land vaan Luik en 't Maosdal, tot in Fraankriek touw. Bij 't oetbreke vaan “De Hollandse Oorlog” in 1672, woort de 65 jaorege Frederik Magnus van Salm, neet mie gesjik geach, um stèrk weerstand te beje, aon de  Franse tróppe. Nog veur 't belèk vaan Mestreech in 1673, door de Franse Keuning Lodewijk XIV, is Frederik Magnus van Salm gestorreve. Umtot me  e deil vaan de tróppe (3.000) örreges aanders hadde ingezat, bestoond 't garnizoen in 1673 slechs oet 6.000 maan. E groet gedeilte vaan 't Garnizoen bestóng oet Zuid-Nederlandse en Spaanse tróppe, en nog 'ne klein Cavalerie regimint vaan Noord Italiaanse elite tróppe, in Spaonse deens. Umtot die tróppe in de Spaons-Franse oorlog (1667-1668) hadde mèt gevochte, waore zie wel beter getraind daan de Nederlandse tróppe. Die Nederlandse tróppe hadde veur 't lèts gevochte in 1648 veur de Vrede van Munster.
De verdeidiging vaan Mestreech woort aongeveurd door de Henegouwse edelmaan Jaques de Fariaux, es Milletaer Gouveneur vaan Mestreech. Es commedant vaan Wiek, woort de Nederlandse kolonel Joan van Paffenrode benump. Keuning Lodewijk XIV had e väöl groeter leger,daan de verdeidegers vaan 't Garnizoen. Lodewijk XIV had oonder aandere 20.000 maan infanterie, en 12.000 maan Cavalerie. Daoneve had heer ouch nog e groet aontal elite-tróppe. Die waore vaan aofkóms oet versjèllende gardes, lijfgardes te voot en lijfgardes te peerd en vaan nog twie compagnieë mèt Musketiers. Daoneve had heer ouch nog de besjikking euver 'nen aontal technische specialiste vaan Artillerie en Genie. De Genie waor belaankriek veur de aonlègk vaan linies, en 't graove vaan tranchées, de laopgraove. Zie woorte hei bij geholpe door de boere oet de dörrepe. Ouch woort 't leger aofgebrach door vivandières, marketensters of beter gezag wasvrouwe, handelere veur de verzörging vaan de soldaote,'n veldhospitaol mèt 'n aontal dokters, chirurgijns en apothiekers.Vaanaof 6 juni 1673 woort Mestreech door 't Franse leger ingeslote, boebij aon twie kante vaan de Maos 'nen aontal stellinge woorte betrokke. D'r woorte ponton-brögke aongelag bij Lichtenberg, Borghare en Smeermaos. Sébastien le Prestre de Vauban (1633-1707), waor aonspraokelek  veur 't belegerings plan. Heer bepaolde boe en wie de laopgraove woorte gegraove, en boe de artillerie 't bèste kós weure opgestèld. Meh ouch in Mestreech waor 'n belaankrieke Vestigingsbouwkundige aonwezeg, naomelek Menno Baron van Coehoorn. (1641-1704). Op 24 Juni 1673 waor 't fies vaan Johannes de Doper, en  keunig Lodewijk de XIV had 't gedach, um veur deen datum de stad in te numme, um zoe d'n euverwinning in de Sint Servaos kèrk te kinne viere. De stad woort aongevalle door de Franse tróppe en oonder leiding vaan oonder aandere Kaptein Lutenant Charles de Batz de Castelmore, beter bekind es graaf d'Artagnan. Nao 'nen aontal gevechte woort e deil vaan de stadsmoer bij de Toongerse Poort veroverd. De Franse meinde de slaag al gewonne te höbbe, meh de Nederlanders kraoge weer d'n euverhand. De Franse moóste ziech trök trekke en daobij kaom Graaf d'Artagnan um 't leve, door 'ne kogel vaan 'n musket. Daonao besloot de Franse keuning um nog zwoerder gesjöt in te zètte, boenao de stad oonder leiding vaan Jaques de Fariaux  nao 'ne week vaan zwoer belèk ziech euvergaof. Zien opvolger es Gouverneur vaan Mestreech oonder Frans bewind, waor Godefroi d'Estrades. Godefroi d 'Estrades waor Gouverneur vaan Mestreech vaan 1673 tot 1678.
Kestiel Valkenberg. 1669
Belèk vaan Mestreech 1673.
Belèk vaan Mestreech 1673.
Belèk vaan Mestreech 1673.
Kaptein Lutenant Charles de Batz de Castelmore d’Artagnan 1611-1673
Sébastien Le Pestre de Vauban 1633-1707.