Home Historie Artieste Bestuurders Febrikke Gouverneurs Kemedie Meziek Vollekstiepe De Werreke
Börgm.Monachon
Pierre Etienne Monachon woort gebore in ’t jaor 1731, in Lucens, Pays de Vaud, (Kanton Bern) Zwitserland. Heer waor ‘ne zoon vaan Balthazar Monachon (Landbouwer) en Francoise Catherine Blanc. Pierre Etienne Monachon is euverleije op 29 Augustes 1811 in Mestreech. Pierre waor tot veur 1794 Kaptein vaan ‘ne Zwitsers regimint , dat in Mestreech verbleef um de stad te verdeidige. Nao den’ oorlogsverklaoring op 1 februari 1793 vaan de Franse Republiek aon de Keuning van Ingeland en de Stadhouwer der Nederlande, woort de stèrkte opgeveurd nao 920 man per bataljon. Pierre Etienne Monachon woort op 4 Oktober 1797 benump tot Commesaris vaan ’t Directoire Exécutif vaan de Municipaal vaan Mestreech. ’Ne Commesaris vaan ’t Directoire Exécutif had gein stum bij de raodsbeslute, meh zoonder ziene touwstumming kóste zie (de raodslede) gein beslissinge weure genome. Ouch kós heer beslute zellevers annulere, en had daorum groete bevooghede in de gemeinteraod. Heer bleef dee functie vervölle tot 17 Aprèl 1800. Lid vaan de Municipale raod waor heer vaan 14 Mei 1800 tot 22 Augustes 1801, en Officeer vaan dee raod waor heer vaan 31 December 1795 tot 12 oktober 1797. Wie heer woort benump tot Municipaal Officeer vaan Mestreech, had me in Mestreech gemingde geveulens euver dee benumming, umtot heer ‘nen aonhènger waor vaan de Franse bezètters in Mestreech en dat woort häöm neet altied in daank aofgenome door die Mestreechtenere. Tot aon zien benumming in ’t Municipaal bestuur (december 1795), had heer nog gein ein officiële functie bekleijd. Heer waor neet gevraog, meh bedelde um ‘ne hoege functie in Mestreech te kinne bekleie. Wie Börgemeister Membrède (ziene veurgènger) um ‘ne Departementaal en Municipaal bestuur te formere mislökde op de weigering vaan de gevraogde kandidaote bestuurders, kraog Monachon eindelek ziene zin. Heer woort gevraog veur ‘ne Departementetale functie in Mestreech.
Meh heer kraog noe vaan twie kante tegewèrking en de benumming woort weer oongedoon gemaak. Pierre Etienne Monachon woort toen mer lid vaan de Municiale raod. Meh ziene kans kaom obbenuits en wel in oktober 1797. Jean Henri Bosch naom konzjee es Commesaris vaan ’t Oetveurend bewind vaan de Municipale raod. ’t Waor toen wel dudelek tot Pierre Etienne Monachon, “ un très zélé, bon patriote, ayant d’excellens principes politiqus et moraux ” den ‘opvolger vaan Bosch zouw weure. Heer woort tot Börgemeister (Maire) benump op 28 Juni 1801 en es zoedaonig geïnstalleerd op 22 Augustus 1801. Zien ambtsperiood eindigde op 18 Miert 1808. Heer waor in 1804-1805 veurzitter vaan de Administratie vaan de “ Hospices Civiles” (Börgelek Ermbestuur). Es Börgemeister waor heer ouch vaan 1804 tot 1808 veurzitter vaan de Kamer van Kaophandel in Mestreech. Nao ziene congé es börgemeister waor heer vaanaof 18 Miert 1808 tot aon zien euverleije op 28 augustes 1811 vice Börgemeister vaan Mestreech. Pierre Etienne Monachon trouwde in de Waolse kerk op 28 September 1775 mèt Madeleine Sophie de Berg. Zie waor weduwe vaan advokaot Guillaume de Bruyn. Madeleine Sophie de Berg is gestorreve  op 8 juni 1796. Pierre Etienne Monachon hertrouwde op 20 November 1798 mèt Anne Mathilde Huyts, gebore op 14 September 1764 in Mestreech en waor ‘ne dochter vaan Hubert Huyts (Kaopmaan) en Marie Mathilde Diericks. Pierre Etienne en Anne Mathilde Monachon   hadde same drei kinder, boevaan twie kinder oet e ieder houwelek vaan Anne Mathilde Huyts.
Börgemeister Monachon 1731-1811    Börgemeister vaan  1801-1808
ne Franse Soldaot, 1800
1.Pierre Sigismund Monachon woort gebore op 21 November 1795 in Mestreech. 2.Louise Hélène Monachon woort gebore op 20 Juli 1797 in Mestreech. 3. Jean Baptiste Monachon woort   gebore op 20 Juli 1802 in Mestreech.Nao de doed vaan Pierre Etienne Monachon in 1811 is zie mèt häör kinder oet Mestreech vertrokke en zien gein gegeves mie euver hun bekind. Pierre Etienne Monachon woort in 1808 opgevolg door Börgemeister Christiaan Coenegracht.(1808-1815).
Mestreech 1649
Home Historie Artieste Bestuurders Febrikke Gouverneurs Kemedie Meziek Vollekstiepe De Werreke
Oetnudiging vaan de Maire (Börgemeister Monachon) veur ‘t bal, ter iere vaan de geboorte vaan Napoleons zäönsje; Napoleon Frans Karel Jozef Bonaparte. In de Redoute zaol um nege oor s’aovends. Miert 1811.