Home Historie Artieste Bestuurders Febrikke Gouverneurs Kemedie Meziek Vollekstiepe De Werreke
 Karel Christiaan van Nassau-Weilburg
Karel Christiaan van Nassau-Weilburg. Gouverneur 1772-1781.
Karel Christiaan van Nassau-Weilburg is gebore op 16 Jannewarie 1735 in Weilburg, en gestorreve op 28 November 1788 in Münster-Dreisen, Duitsland. Heer waor den einigste  zoon vaan Vorst Karel August van Nassau-Weilburg (1685-1753) en Augusta Frederika Wilhelmina van Nassau-Idstein (1699-1750). Karel Christiaan van Nassau waor 'n Milletaer en Diplomaat in deens vaan de Republiek der Zeven Verenigde Nederlanden, en waor oonder aandere Milletaer Gouverneur vaan Mestreech en Bergen op Zoom. Karel Christiaan van Nassau-Weilburg trouwde in den Haag op 5 Miert 1760 mèt Carolina van Oranje-Nassau.(1743-1787). Carolina waor e zuster vaan Stadhouder Willem V. Umtot  Carolina van Oranje-Nassau, in 't geval vaan 't euverlije vaan Willem V , in aonmerking zouw kaome vaan 't Stadhoudersjap, gónge zie in Den Haag woene, en wel aon 't Korte Voorhout in 'n door Pieter de Swart oóntworpe stadspelies, wat noe de Koninklijke Schouwburg is. ‘t Houwwelek brach häöm e rieke broetsjat,en ‘n baon es Generaol der Staatse Infanterie vaan ‘t Regimint Overijsel, en ‘t Gouvernemintsjap vaan Bergen op Zoom, en later ouch nog vaan Sluis. Meh ‘t woort häöm oontzag um invloot op de regering te höbbe. Naotot Willem V mierderjäöreg waor gewore, gónge Karel Christiaan en Carolina woene in Weilburg en Kirchheimbolanden. Kirchheimbolanden is 'n kleine stad in de Duitse deilstaot Rijnland-Palts, gelege in de Donnersbergkreis. De stad heet noe 7.726 inwoeners. 't Is de Kreisstadt vaan 't Donnersbergkreis. Oet de ech vaan Karel Christiaan van Nassau-Weilburg en Carolina van Oranje-Nassau woorte 15 kinder gebore; 1.George Willem Belgicus van Nassau-Weilburg, gebore in 1760 en gestorreve in 1762. 2.Willem Lodewijk Carel van Nassau-Weilburg, gebore in 1761 en gestorreve in 1770. 3.Augusta Maria Carolina van Nassau-Weilburg, gebore in 1764 en gestorreve in 1802. 4.Wilhelmina Louise van Nassau-Weilburg, gebore in 1765 en gestorreve in 1837. Zie waor getrouwd mèt Hendrik XIII Reuss. 5.Frederik Willem van Nassau-Weilburg, gebore in 1768 en gestorreve in 1816. Heer waor getrouwd mèt Louisa Isabelle van Kirchberg. 6.Carolina Louisa Frederica van Nassau-Weilburg, gebore in 1770 en gestorreve in 1828. 7.Karel Lodewijk van Nassau-Weilburg, gebore in 1772 en gestorreve ???? 8.Karel Frederik Willem van Nassau-Weilburg, gebore in 1775, en gestorreve in 1807. 9.Amalia Charlotte Wilhelmina Louise van Nassau-Weilburg, gebore in 1776 en gestorreve in 1841. Zie waor getrouwd mèt Victor II van Anhalt-Bernburg-Schaumburg-Hoyn. 10.Henriette  van Nassau-Weilburg gebore in 1780, en gestorreve in 1857. 11.In 1767,1778,1779,1784, en 1785 woorte vijf naomloze kinder gebore.
Karel Christiaan van Nassau-Weilburg 1735-1788.
Vorst Karel August van Nassau-Weilburg 1685-1753.
Carolina van Oranje-Nassau 1743-1787
Karel Christiaan van Nassau-Weilburg waor dèks absent in Bergen op Zoom. Heer woende de mieste tied vaanaof 1763 in Kirchheim-Bolanden , en kaom allein mèt zien femilie dao nao touw um dao deil te numme aon Milletaere oefeninge en um de Vestiging in Bergen op Zoom te inspectere. In 1772 benumde Prins Willem V häöm tot Milletaer Gouverneur vaan Mestreech. Keizer Josef II maakde vaanaof ‘t dat jaor aonspraok op Mestreech. Jozef II waor vaan 1765 tot 1790 keizer vaan ‘t Heilige Roomse Rijk (Rooms Duits Keizer), en vaan 1780 tot 1790 heerser vaan de Habsburgse Monarchie. Heer waor de ajdste zoon vaan Keizerin Maria Theresia (1717-1780)en Keizer Frans I Stefan (1708-1765), en waor e broor vaan Marie Antoinette. In oktober 1784 sjikde Jozef II ‘nen twietal sjepe de Schelde op en begos de Keteloorlog, um zoe vraak te nume op de Noord- Nederlandse patriotte, die ziene achterneef Lodewijk Ernst van Brunswijk-Lüneburg-Bevern hadde verbanne. Heer eisde vrije handel op Oost-Indië, opening vaan de Schelde, dee bij de Vrede van Münster in 1648 touw waor gebleve, en annexatie vaan Mestreech, meh dat góng evels neet door. ‘t Brach wel Karel Christiaan gèt in de probleme, umtot heer ouch neet mèt de Keizer wouw breke, en um zoe dynastieke probleme te veurkaome. Heer weigerde daan ouch es Veldmaarschalk de plaots vaan de aofgetroje Hertog van Brunswijk in “ Staatse Dienst”, op te volge, en trok ziech eind 1784 gehiel oet de “Staatse Dienst” trök. Karel Christiaan perbeerde op zien eiges meneer de twiste en probleme in de Republiek op te losse. Heer lag ziech touw um zien Nassause bezittinge weijer oet te breie, door oonder aandere ‘n erf verdraag te slete mèt zien sjoenbroor Willem V. Karel Christiaan van Nassau-Weilburg bezaot ‘t groetste deil vaan hun bezittinge en geujere, vaan de Walramsche kant vaan ‘t Hoes Nassau. En oonderwijl Willem V bekans alle geujere en bezittinge vaan de Ottonische kant had. In 1777 woort 't Gouvernemints gebouw, gelege in de Bouillonstraot, verbouwd. Karel Christiaan van Nassau-Weilburg gaof de stad Mestreech 'ne rinteloze liening vaan 30.000 gölde, dee me jaorleks mèt 4.000 gölde mós aoflosse. De oetveurder vaan de verbouwing waor architec Mathias Soiron jr.(1748-1834).  Karel Christiaan van Nassau-Weilburg waor Generaol vaan de Infanterie in Staatse deens, en waor Milletaer Gouverneur vaan Mestreech vaan 1772 tot 1781, en Gouverneur vaan Bergen op Zoom vaan 1773 tot 1784. Nao zien benumming tot Veldmaarschalk vaan de Boven-Rijnse Kreits, vroog Karel Christiaan van Nassau-Weilburg in 1781 um ziene congé es Gouverneur vaan Mestreech en häöm vaan zien Staatse functies te oontsloon. Karel Christiaan van Nassau-Weilburg is gestorreve op 28 November 1788 in Münster-Dreisen, Duitsland en woort opgevolg es Gouverneur vaan Mestreech door Frederik van Hessen-Kassel.
Karel Christiaan van Nassau-Weilburg 1735-1788.
Kestiel Kirchheimbolanden
Carolina mèt haor kinder (Sjèlder Anton Wilhelm Tischbein) 1775