Home Historie Artieste Bestuurders Febrikke Gouverneurs Kemedie Meziek Vollekstiepe De Werreke
    Gilles van Berlaymont
Gilles van Berlaymont Gouverneur 1567.
Gilles van Berlaymont, Heer vaan Hierges is gebore in 't jaor 1540 en is gestorreve bij ‘t belèk vaan Mestreech, op 18 Juni 1579. Heer waor 'ne zoon vaan Charles Baron de Berlaymont (1510-1578) en Adrienne de Ligne Barbencon.  Gilles van Berlaymont waor 'nen edelmaan, milletaer en staotsmaan, en waor Stadhouder oonder Spaons bewind vaan versjèllende geweste vaan de Habsburgse Nederlanden. Heer waor getrouwd mèt Lambertine de Croy. Gilles had nog  twie  zusters Marie de Berlaymont, en Yolande de Berlaymont en de gebreurs Claude de Berlaymont- seigneur de Hautepenne, Charles de Berlaymont-Knight of Malta, Lodewijk (waor Bissjop) en Florent de Berlaymont-Prince dÉpinoy. Hierges is e gemeinte in 't Franse departement Ardennes, en heet noe zoegèt 200 inwoeners,  gelege aon de Frans-Belsje grens. Twie vaan zien breurs, Florent en Claude waore ouch belaankrieke milletaere oet de begin periode vaan de Tachtig-jaorige Oorlog. Zien derde broor Lodewijk van Berlaymont waor Bissjop vaan Kamerijk. Kamerijk waor 'n suffragaan vaan 't Aartsbisdom Rijsel (Fraankriek). Gilles van Berlaymont oondersjeide ziech, in december 1566 tot Miert 1567,  bij 't belèk vaan Valencijn (Henegouwen), oonder 't bevel vaan de Spaonse leger-aonvoerder Filips van Noircarmes. De belegering vaan Valencijn, de Slag bij Wattrelos (Vlaomse naom vaan Waterloo) en de innaome vaan Doornik, weurt gezeen es 't ierste gewaopende treffe in den'opstand vaan De Nederlandse Geweste tege 't Spaonse gezag, wat e jaor later zouw leie tot de Tachtig- jaorege Oorlog. Gilles van Berlaymont woort in Aprèl 1567 d'n ierste Milletaere Gouverneur vaan Mestreech, dat toen ‘n garnizoens-stad woort. In dat zelfde jaor woort heer zjus wie ziene pa lid vaan de Raod vaan Beroerten, en woort heer 'ne belaankrieke höllep vaan Alva en Requesens bij 'nen aontal milletaere operaties. In 1572 woort Gilles van Berlaymont touwgelaote tot de Orde vaan 't Gulden Vlies, en woort Stadhouder vaan Friesland, Groninge, Drente en Overijsel (1572-1573), en kort daonao ouch Stadhouder vaan Gerle en Zuphen (1574-1578). In 1574 woort heer plaotsvervèngend Stadhouder vaan Holland, Zeeland en Utrecht (1574-1577).
Es “ Mestre de Camp “ (commedant vaan alle regiminte of Colonel Generaol)  vaan 't Spaonse leger, deeg heer in 1574 'nen inval in West-Friesland, en veroverde in 1575 Oudewater, de stad die heer nao de verovering  leed platbranne. In miert 1576 sjreef heer in 'n breef aon de Raod vaan Staote euver de slechte touwstand in zien geweste. Wie ouch ‘nen aontal aander stei, sloot Gilles van Berlaymont, ziech nao de Spaanse Furie aon, bij de opstendige Staten-Generaal. Heer deeg dat op 15 Oktober 1576 en op 19 Oktober sjreef heer e breef aon Boussu, um ouch partij te keze vaan de Staten-Generaal. Gilles gaof zjus wie ziene pa, 't vertrouwe aon de nuie Landvoogd Don Juan, door de Unie vaan Brussel te teikene. Same mèt Boussu veroverde heer 't Kastiel Vredenburg, op 't dao achter gebleve Spaonse Garnizoen. Daonao naom heer deil aon Don Juan's machsgreep, um de Citadel vaan Name te verovere. Gilles woort later beloend mèt hoege Spaonse posities. Meh heer verloor daodoor wel zien Stadshouder-sjappe, in de noe opstèndege geweste vaan Holland, Zeeland, Utrecht, Gelre en Zutphen. Op 2 September 1577 woort heer lid vaan de Raad van State. In 1578 woort Gilles van Berlaymont den’opvolger vaan zien gestorreve pa, baron vaan Hierges en Stadhouder vaan Namen en Artesië. Gilles van Berlaymont had ouch alderlij economische activiteite opnui oontwikkeld, zoe wie in stein, marmer,iezer en loed. Heer bouwde zoe'n hoonderd boerehove’s um zoe zien soldaote (4.000/6.000) te veurzien vaan ete. Ouch speciaoliezeerde heer 't fokke vaan peerd, kalkoene en oontwikkelde wijer landbouw-gewasse.
Belèk vaan Mestreech 1579 door de Spaonse veldhier Alexander Farnese (prins, later hertog vaan Parma)
Heer bouwde ouch, in Ham-sur-Meuse e soort vaan Hospitaol. Heer bouwde dat neve 'n inriechting vaan Leperapatiënte, oet d'n tied vaan de Kruusvaarders. Al 't medische personeel woende in Foisches. De versterkde boerderij in Foisches, genaomd Tempeliers, waor e boerderij geleid door Kruusvaarders. Same mèt zien vrouw leide heer de bouw vaan de kerk vaan Hierges in de jaore 1565 tot 1579. Gilles van  Berlaymont is gestorreve bij 't belèk vaan Mestreech op 18 Juni 1579. De groets opgezatte aonval vaan de Spaonse veldhier Alexander Farnese (Prins en later Hertog vaan Parma) waor bedoeld um ziech te verzekere vaan de stad, umtot Mestreech um zien geografische ligking en zien economische beteikenis 'n belaankrieke Vestigings-stad waor.
Kestiel vaan Hierges.
Kestiel vaan Hierges (1540)
Orde vaan ‘t Gulden Vlies.
Femilie Waope Berlaymont.
Belèk vaan Mestreech 1579 door de Spaonse veldhier Alexander Farnese Hertog vaan Parma