Home Historie Artieste Bestuurders Febrikke Gouverneurs Kemedie Meziek Vollekstiepe De Werreke
Johnny Blenco
Op ‘t Vriethof op ‘n baank.1973.
Johnny Blenco (Jozef Vriezelaar), woort gebore op 9 Juni 1938 in de Tillystraot in 't Witte Vrouweveld- Mestreech, en is gestorreve op 27 Jannewarie 2020 in Mestreech. Heer kaom oet 'n arbeiders gezin boevaan ziene pa wèrkde op 't Sphinx febrik. 't Waor hel en oongezoond wèrke in 't febrik, en nao 't wèrk góng heer zoe af en touw kaarte mèt zien vrun in  kaffee “In Den Karkol” gelege in de Stokstraot. Es 't daan gèt laat woort en pa nog neet thoes waor, lepe Johnny en zien ma vaanoet 't Vrouweveld nao dee kaffee um pa te goon hole. Zoe raakde Johnny einegszins vertrouwd mèt 't leve in de Stokstraot en zien bewoeners, ouch umtot heer 'n matant had die in de Smeistraot woende, en dao dekser op bezeuk góng. Heer zouw dao later nog e leedsje  euver sjrieve vaan “De Aw Stokstraot”. Al vreug bleek tot Johnny e bezunder musikaol tallent waor, en kraog vaan zien awwers al gaw zien ierste gitaar. Nao e tiedsje woort heer gevraog es zènger-gitaris bij 'n rock en roll bendsje, dat in  Mestreech en umstreke góng optrejje. Ze hadde in deen tied 'n beperkde geluid-installatie en 't geluid waor mer gèt geklomel. 't Bleef neet allein bij speule, umtot Johnny ouch de gaof had um zellevers leedsjes te componere en tekste te sjrieve. Oonderwijl had heer nao 'n aontal bäönsjes, 't beroop vaan glazewasser aongenome. Heer zouw dat nog väöle jaore blieve doen, oondaanks zien drök bestoon vaan componis, teks-sjriever en zènger. Ouch naotot heer 'nen aontal hits had vaan zengers of vaan häöm zellevers. Es glazewasser kaom heer dèks bij lui en hun verhaole deeg häöm dèks inspirere bij 't componere en sjrieve vaan nui leedsjes.'t Optrejje mèt zien Rock en Roll orkèske in oonder aandere in Valkenberg, doorde dèks tot in de late ore, en d'n daag daonao stoont heer gèt oongemekelek op zien lèdder de roete te wasse. Johnny waor d'n ierste Rock en Roll zènger vaan Mestreech. In 1958 góng heer in militaire deens en dao maakde heer oonder aandere leedsjes euver zien offecere en of oonder-offecere, die häöm daan weer trök pakde op 'n extra rundsje op de störm-baon. Zoe begós Johnny Blenco daan mèt 't sjrieve vaan leedjes tijdens zien deens-tied. Die  ierste tekste heet heer gesjreve, jeh wie kin 't aanders, op 'n  sjrief- blok vaan de Keuninklek Landmach. In dees  blok stoon zien ierste 100 tekste. De ierste teks dee heer heet gesjreve is vaan 5 Jannewarie 1958, heer waor toen gelegerd in Venlo. De lètste teks in 't blok is vaan 5 Mei 1959 toen heer in Oirschot waor.
In militaire deens mós me ummertouw zien patroen tasse, reemkes en koppel insmere mèt greune blenco. Jozef kraog toen 't gedach um zien artiestenaom dao aon te verbinde en bedach zoe zien artiestenaom vaan Johnny Blenco. Nao zien deenstied in 1959 kraog heer zien ierste plate- kontrak bij 't Omega label in Belsj. Nao 'nen'aontal proofopnames in Augustus en November kaom 't jaor daonao in Jannewarie 1960 zien ierste single oet, vaan Baby oh Baby. Zien producer waor toen Hr.Dils en zien arrangeur waor Hr.Welter. Heer componeerde en sjreef daonao miejer leedsjes die heer opsjikde nao zien producer Dils, evels dee reageerde mèt; 't zien leuke leedsjes meh iech höb dao geine zenger of zangeres veur. Dat waor veur häöm de reije um ze meh zellevers te goon zinge. Dat momint waor, dat de arties Johnny Blenco waor gebore. In 't begin kós Johnny neet zoe good zinge, meh dat woort later mèt gèt hölp ummertouw beter. 't Waor neet ummertouw gemekelek um e pleetsje op te numme, umtot me zoegèt 2000 singles mós verkoupe um weer in aonmerking te kaome um e nui pleetsje te kinne opnumme, vertèlde Johnny in 'n interview. Nao "Baby oh baby", sjreef heer mèt wisselend suksès, "Evelyn", "Alleen", "Een kus van jou cherie","Oh lola","Liefste" en "Wanneer de lente komt". In de beginjaore vaan zien carrière sjreef en zóng Johnny Blenco ouch inkele Duitstaolege leedjes. Ouch umtot in deen tied Duitstaolege leedjes 't good dege in euze regio. Zien Duits leedsje "Magdalena" woort 'n echte hit, ouch door 't gooi plugwèrk vaan Henk Severs vaan plate-winkel de Harp in Mestreech, e begrip in deen tied in Mestreech, en wiet dao boete.  Nen'aontal Duitstaolege leedjes waore;  "Gib mir die hand", "Isabella", "Magdalena", "Reich mir deine hand" en "Weine nicht".
Johnny Blenco waor neet allein zènger muzikant meh ouch teks-sjriever componis veur 'n groet aontal artieste en dat brach zoe af en touw geld in 't läöjke. Zoe brach heer in 1975 't leedsje vaan “Vadertje lief” dat jaomer genóg neet väöl verkoch woort. Evels op d'n B kant stoont 't leedsje vaan “Mammie ik zie trane in je ogen” 't Woort gezonge door Kleine Arthur, 'n oonbekind joonk zengerke oet Braobant. Drei jaor later in 1978 kaom e pleetsje op de mèrret mèt de titel vaan “Pappie ik zie tranen in je ogen “ dat in korte tied e groet suksès woort. Gradje (Grad Hölzken) späölde in 't leedsje 'ne tristege pa, oonderwijl 't kind-steerke  Arno Maas 't refrein zóng. Door 'n sjrief-fout op de plate-hoes stoont 't duo ouch wel bekind es Arno en Gratje. Johnny Blenco zien vrouw waor in deen tied vertegenwoordigster die de plate-zake aofgóng um 't rippertoire vaan Johnny te verkaope, en woort in Belsj gefeliciteerd mèt 't suksès vaan de nuie single vaan “Pappie ik zie trane in je ogen” vaan Arno en Gradje. Alweer een hit ! 't Waor zuver plaggiaot en Johnny wachde nog e paar weke aof tot 't ‘n groete hit waor, um toen 'n klach in te dene bij de Buma/Stemra. Johnny Blenco woort in zien geliek gestèld en de platenfirma vaan CNR mós de rechte aon Johnny betaole. 't Waor 'n riechtege kaskraker ! Johnny Blenco vertelde vaan, d'r weurt gèt denigrerend gedoon euver Smartlappe-Meziek, meh 'nen eder kin ze wel allemaol mèt zinge! Johnny Blenco heet jaore laank bij de platefirma Telstar vaan Johnny Hoes gewèrk en dao väöl plate gemaak, dèks oonder 'nen aandere naom zoe wie De Mosselmannekes, Johnny Hot, Theo & de Afzwajers, Jan Patat, enz. Die plate mèt dobbelzinnige tekste woorte veural in Belsj good verkoch en waore dao populair. In deen tien woorte ouch sex-plate in Belsj oetgebrach meh dat waor verboje, en 't gebäörde tot de Genderme de kaffee inkoume um de Juxbox nao te kieke of me sexplate d'r in had. Die woorte daan mèt e perces in beslaag genome. De pleetsjes vaan Johnny Blenco gezónge oonder 'nen aandere naom, waore wel dobbelzinneg meh woorte heimelek wel touw-gestaande.
In de begin periood  maakde heer ouch väöl Vastelaovends meziek oonder aandere same mèt Sjeng Kraft. Bekinde Vastelaovends leedsjes vaan Johnny zien; “Tant Neske”, “De Meitskes vaan Mestreech”” , 't “Clubleed vaan MVV”,"Tonia", "'t Moordjoonk"," Zet diech op d'n huukskes", "Mini Mieneke", "Hi ha happening", "d'n Aria vaan Maria", en "De Globetrottersmars" , en Vastelaovends L.P.'s , Drei Daog Karneval in Mestreech en Vastelaovend in Limburg. Wie Johnny Blenco wèrkde veur de plate-firma Monopole in Belsj en in Nederland vertegenwoordig door de firma Dureco,  woort heer op 'n gegeve momint in contac gebrach mèt de Nederlandse zangeres Anja (van Avoort). Johnny Blenco sjreef veur haor 'n groete hit, “De Laatste Dans”. Dees single stoond weke laank in de Belzje en Nederlandse hitparades, en woort bekroend mèt 'ne gouwe plaat. In de jaore daonao scoorde Anja mierder hits, boe oonder aandere “Speel niet met mij ” (1970), “Nu dans je nooit meer met mij”(1971) en “Op het strand van Cadzand”(1972). Neve häör solohits scoorde zie mèt producent / componis Johnny Blenco, es duo Anja & Johnny,  hits zoe wie “Jaren komen, jaren gaan(1971)”, Waarom kwam jij toch in mijn leven”(1971) en “M'n ouwe arreslee”(1972). Zoewel de singles es de albums woorte regelmaoteg goud. Dao neve  woorte zien leedjes ouch door aandere artieste gezónge en oetgebrach. Zoe woort zien keers-L.P. in 't Nederlands oetgebrach door de “Zangeres zonder Naam”. Ouch mèt en veur Sjeng de Belsj, (Jean Paulussen) oet Veldwezelt, sjreef en componeerde Johnny hits. Sjeng de Belsj späölde al vaanaof zien tiende jaor trèkzak, en studeerde aon de mezieksjaol vaan Mestreech en Hoensbroek. Heer zong ummertouw in 't Mestreechs, vaandao ouch zien artiestenaom vaan "Sjeng de Belsj". De tekste waore vaan Johnny en de meziek sjreef Sjeng zellevers. Ze hadde väöl suksès mèt de nommers "Es iech in dien auge kiek","de Polonaise Trein" en "de Leefs mer eine kier"', “ Es de roeze weer goon bleuje” en “Dao moot op gedroonke weure”.
Johnny Blenco vörmde inkele jaore 'n zangduo mèt zien dochter Marjo. Same maakte ze  5 dialek C-D  albums oonder de naom vaan Marjo & Johnny. In 1999 “Te Sjoen um Woer te zien” , in 2000 “Höb geer effe tied”, In 2002 “Dee Sjoene Tied”, in 2003 't “Leve kin zoe sjoen zien”, en in 2004 't album “Um Noets te Vergete”. Bekinde nommers vaan 't duo waore; “Iech höb vaan diech gehawwe”, “De bruudsjes vaan de bekker”, “Kom weer nao hoes”, en “Die Griekse melodie”. Same vörmde zie ouch 't Noordzee Duo en brochte in 't nederlands 'nen aontal L.P's en C.D's oet. Bekinde nommers hei vaan zien oonder aandere; “Die mooie tijd”, “Ik heb van jou gehouden”,”Ga Maar”, “Elke dag”, en ”Mijn droom”.'t Groetste suksès vaan Johnny Blenco woort in Mestreech in 1973 ziene L.P. vaan “Op  't Vriethof op 'n Baank”, dee bij de platemaotsjappij vaan Dureco waor gemaak. Op 'ne daag belde 'n producer vaan Dureco op, mèt 't verzeuk aon Johnny Blenco um 'n L.P. mèt Mestreechter leedsjes te make. In oonder aandere de provincie Drente waor zoe'n dialek plaat e suksès gewore, en me had 't idee um ouch in Mestreech zoe'n dialek L.P. te goon make. 't Waor veur Johnny gein probleem, ouch umtot heer al e paar nommers op de plaank had ligke, zoe wie “Tant Neske” en “Op 't Vriethof op 'n baank”. 't Waor e good idee ouch umtot d'r nog neet zoeväöl Mestreechter plate in deen tied woorte en waore gemaak. Binne e paar weke had Johnny Blenco twelf nommers gesjreve en kaom de L.P. in 1973 bij Dureco oet. In deen tied mós me 't veural höbbe vaan zelf promotie, en zoe kaom 't tot Johnny Blenco 'nen' aontal zaoterdag-middege in de Groete Staat, veur de Vroom en Dreesmann zien plaat “Op 't Vriethof  op 'n Baank” zellevers deeg promote. De ierste weke leep 't störm mèt de verkaop vaan de L.P. en al gouw waor de L.P. good veur 'ne gouwe plaat. De bekindste nómmers  vaan die plaat zien, Op 't Vriethof op 'n Baank, Heimwee naor  Mestreech, Tant Neske, Es tiech mich puuns Merie, en Iech höb de piep leeg. Johnny Blenco zóng en späölde op zien gitaar, en dochter Marjo rekende aof en deeg ze in 'n tuut. Nao 't groete suksès vaan de L.P. “Op 't Vriethof op 'n baank” kaom in 1975 de twiede Mestreechter LP oet; "Vaan op Sint Pietersberrig tot in de Kazjematte". Bekinde leedjes op dees LP zien: Sint Pietersberrig, Mestreech is neet breid meh laank, De Aw Stokstraot, In de Kazjematte. Ouch deen twiede L.P. woort good verkoch in Mestreech. In 1977 kaom mèt de Keersemes de L.P. oet mèt es titel "Keersmes roond de Vriethof". Op dees LP stoon sjoen keers-leedsjes oonder aandere vaan; “Keersmes roond de Vriethof”,”Belkes heij, belkes dao”,“Op de Amiejer heij”, “Stelle Nach”,en “De Keersmaan”. 't Album "Mestreech bleif toch Mestreech" kaom oet in 1981. Op 't veerde Mestreechs album stoon bekinde leedjes wie; Mestreech bleif toch Mestreech, 't Zal altied zoe goon, Iech bin vaan Mestreech, en de twie bekindste leedsjes vaan dee L.P., zien 'nne Böschauffeur en Ach medam kom ins heij.
Daonao bleef 't 12 jaor stèl mèt 't producere vaan 'n Mestreechter plaat. Meh in 1993 waor 't weer zoe wiet umtot Johnny Blenco toen 'n Mestreechter L.P. had gemaak mèt de titel vaan "Goojemorrige leef luij". De plaat bevat 'nen aontal bekinde Mestreechter leedsjes oonder aandere wie; Mie leef Mestreech, Selvrouweplein en 't is Unne Boer vaan Boete. Veer jaor later in 1997 broch Johnny Blenco twie albums oet, naomelek;  " 'n Tuut Mestreechter Geis" en "Mestreech dat Stökske Goud". 't Album vaan "Mestreech dat stökske Goud" daovaan heet Johnny Blenco zellevers d'n hoes vaan oontworpe. 't Is 'ne foto vaan de Aw Maosbrögk mèt op d'n achtergroond 't aajd gedeilte vaan Mestreech. Bekinde leedsjes vaan dees L.P. zien oonder aandere 't titel nommer ; Mestreech dat stökske goud, Boe is 't kinneke daan, Achter de Wolke sjeint de Zon, Dao sprink miech e Vloeij op mien bats, Waorste mer gebleve wieste waors, en Ach Slivvenhier. 't Twiede album dat in 1997 woort oetgebrach waor  "'n Tuut Mestreechter Geis" dat op C.D. woort oetgebrach. Op de C.D. Stoon 16 nommers boevaan de leedsjes ;  Leveke, Este in Mestreech gebore bis, 'n Tuut Mestreechter Geis, en Kinder vaan Mestreech de bekindste leedsjes vaan zien. 't Album "In Mestreech is 't 't beste" versjeen 'n jaor daonao in 1998. Op dee C.D. stoon 'nen aontal vaan 15 leedsjes, oonder aandere; Knoevele, In Mestreech is 't 't beste, Puun miech nog ins, Euzzen awwe Chippendale, Om totse miech nums zoe wie iech bin en Trök nao Mestreech. Same mèt de gróp Pikkatrillaz maakde heer in 2007 e Vastelaovends-Rap- pleetsje naomelek, Hi Ha Rappening, en dat woort väöl mèt de Vastelaovend gedrejd. Hi Ha Happening waor e Vastelaovends-leedsje vaan Johnny Blenco oet 't jaor 1962 en de opname mèt de Pikkatrillaz waor ein vaan de lètste leedsjes dee heer opgenome heet. Op zoondag 27 Jannewarie is Johnny Blenco op 81-jaorege leeftied gestorreve. Jef Vriezelaar wie Blenco's echte naom waor heet miejer daan 2500 leedjes op zien naom stoon. Daovaan zong heer d'r 'n groet deil zellevers, meh heer waor ouch hofleveranceer vaan väöl Vlaomse en Nederlandse Chanteurs en Chanteuses.
Vaan op Sint Pietersberg tot in de Kazjematte.
Mestreech blijf Mestreech.
Mestreech dat stökke Goud.
Goojemörrige leef luij.
‘n Tuut Mestreechter Geis.
In Mestreech is ‘t ‘t Bèste.